Kardiologu nga Klinika e Kardiologjisë Dr. Imri Jashari, tregon rreziqet që vijnë nga ajri i ndotur për pacientët me sëmundje të zemrës
Drejtori i Klinikës së Kardiologjisë në QKUK thotë se përveç që ajri i ndotur ndikon negativisht në traktin e sipërm respirator, është vërtetuar nga studimet se ka edhe efekte negative në zhvillimin dhe përkeqësimin e sëmundjeve të zemrës, shkruan Gazeta Shneta.
“Madje disa studime shkojnë aq larg sa konstatojnë se vdekshmëria nga ajri i ndotur është më e lartë sesa nga konsumimi i drogës apo obeziteti”, thotë Dr. Imri Jashari. Ai shton se për këtë ka alarmuar edhe Shoqata Evropiane e Kardiologëve, e cila ka dal me vlera të larta të vdekshmërisë dhe rrezikshmërisë së ngritur për pacientët me sëmundje të zemrës.
Kardiologu Jashari pohon se pacientët që janë me paaftësi të zemrës mund të kenë përkeqësim të gjendjes klinike të tyre, ndërsa si formë kronike ajri i ndotur mund të shkaktojë zhvillimin direkt të çrregullimeve në sistemin e qarkullimit të gjakut.
“Është një sëmundje që quhet ateroskleroza ku ajri i ndotur ndikon në zhvillimin e përshpejtuar të saj. Ateroskleroza është ajo që shkakton probleme mjaft të mëdha tek pacientët me sëmundje të zemrës”, tregon mjeku.
Personat që kanë probleme të verifikuara të zemrës, Jashari i preferon që t’i shmangen sa më shumë daljes në ambiente të jashtme dhe aq më pak në rrugët me qarkullim të shtuar të automjeteve ku ndotja e ajrit është direkte.
Kardiologu thotë se është e preferuar konsumimi i lëngjeve në sasi të mjaftueshme, ndonëse nuk kanë ndonjë ndikim preventiv nga efekti i veprimit të ajrit të ndotur. /Gazeta Shneta/