Konkursi për drejtor të Klinikës Gjinekologjike në QKUK është anuluar. Këtë e ka konfirmuar për Gazeta Shneta drejtori i SHSKUK-së, Dr. Basri Sejdiu.
Gazeta ka mësuar se konkursi është anuluar për shkak të përfoljes për ndikime politike. Këto ndikime i ka ngritur edhe kandidatja e cila ka udhëhequr deri më tani këtë klinikë, Dr. Myrvete Paçarada. Madje ajo në një bisedë për Gazetën pati kërkuar që kandidatët të mos vlerësohen si anëtar të Partisë Demokratike të Kosovës, por të repsketohen gradat shkencore dhe akademike.
Paçarada ka deponuar edhe një ankesë kundrejt Komisionit Vlerësues pasi e ka konsideruar të jashtëligjshme thirrjen e kandidatëve në intervistën me gojë, të cilët nuk i plotësojnë kriteret e konkursit.
Por ndikimin politik e ka mohuar drejtori Sejdiu. Ai ka thënë se konkursi është anuluar pasi Komisioni ka vlerësuar se nuk ka pasur kandidatë të përgjegjshëm.
Testi me shkrim solli konkurrencë të fortë në Klinikën e Gjinekologjisë, të cilin e kanë kaluar katër kandidatë. Me më së shumti pikë ka dal Dr. Jakup Ismaili me 80 sosh, duke lënë prapa Dr. Fehmi Ahmetin me 76. Në vendin e tretë është ushtruesja e detyrës së drejtorit, Dr. Myrvete Paçarada me 75 pikë, ndërsa në të katërtin Dr. Shpresa Krasniqi me 52 pikë. Testin nuk kanë arritur ta kalojnë Dr. Zef Ndrejaj me 33 pikë dhe Dr. Brikenë Dacaj me vetëm 28. /Gazeta Shneta/