Spitali “Bahceci” ka dal sot me një deklaratë ku kanë kundërshtuar konfiskimin e embrioneve nga Inspektorati Shëndetësor. Zyrtarët e këtij të fundit i kanë dërguar embrionet e ngrira në Klinikën e Gjinekologjisë në QKUK.
Këtë veprim të Inspektoratit, drejtuesit e “Bahcecit” e kanë konsideruar të papranueshme. “Zhvendosja e tankeve, që përmbajnë material shumë delikat që kërkojnë mirëmbajtje të vazhdueshme nga personeli i specializuar, është një praktikë e papranueshme dhe jo ligjore nga pikëpamja jonë”, thuhet në këtë deklaratë, shkruan Gazeta Shneta.
Ky spital ka paralajmëruar se do të shfrytëzojë të gjithë mekanizmat ligjor vendor dhe ndërkombëtar për të kërkuar dëmshpërblim nga shteti për këtë veprim.
Para disa ditësh Spitali “Bahceci” u bastis nga Policia e Kosovës dhe Inspektorati Shëndetësor. Me këtë rast u arrestuan katër persona nën dyshimet për transplantim të paligjshëm të organeve dhe qelizave, ndërsa tanket me embrione u dërguan në Klinikën e Gjinekologjisë në QKUK.
Lexoni deklaratën e plotë të Spitalit “Bahceci”:
DEKLARATË
Dëshirojmë që të informojmë publikun se nuk pranojmë ndonjë nga pretendimet e paraqitura dhe me padurim e presim ditën kur e vërteta do të dali në dritë.
Duke u bazuar në një dyshim, Inspektorët e Inspektoriatit të Ministrisë së Shëndetësisë kanë vendosur për të zhvendosur tanket tona të embrioneve në QKUK – KOGJ. Ky vendim, që nuk është i bazuar në dëshmi të forta për momentin, kanë vënë punonjësit tanë dhe pacientët në një pozitë shumë të vështirë. Zhvendosja e tankeve, që përmbajnë material shumë delikat që kërkojnë mirëmbajtje të vazhdueshme nga personeli i specializuar, është një praktikë e papranueshme dhe jo ligjore nga pikëpamja jonë.
Sipas të gjitha rrethanave, përgjatë kësaj kohe, ne kemi qenë të kujdesshëm që të ofrojmë gjithë asistencën tonë të nevojshme, por nuk jemi në gjendje të ndërhyjmë arbitrarisht në punën e institucioneve publike që ushtrojnë përgjegjësi ligjore. Prandaj, edhe pse ne nuk pajtohemi me këtë proces, kemi qenë të detyruar dhe nuk kemi pasur mundësinë ta mirëmbajmë materialin në tanke apo të ndalojmë veprimet e institucioneve publike.
Si një investitor i huaj në Kosovë përafër 10 vite, institucioni ynë do të përdorë të gjitha të drejtat ligjore përmes mekanizmave të nevojshme vendore dhe ndërkombëtare për të kërkuar dëmshpërblim për çdo veprim të padrejtë dhe të paligjshëm të autoriteteve. Prioriteti ynë më i lartë është siguria dhe komoditeti i pacientëve tanë.
Sikurse e cekëm më lart, ne i besojmë sistemit të drejtësisë së Kosovës dhe shpresojmë se ajo do të shërbehet. I falenderojmë pacientët tanë dhe të afërmit e tyre për përkrahjen gjatë këtyre kohëve të vështira.