Pas dorëheqjes së dy kardiokirurgëve në QKUK, Dr. Raif Çavolli dhe Dr. Arbër Kutllovci, kanë reaguar zyrtarët e Lëvizjes Vetëvendosje të cilët kanë paralajmëruar ndryshime
Nënkryetarja dhe deputetja Fatmire Mulhaxha-Kollçaku, e ka konsideruar si lajm të hidhur dhe turp për zyrtarët që menaxhojnë me shëndetësinë në Kosovë, shkruan Gazeta Shneta.
“Lajm i hidhur se kardiokirurgu, Dr. Raif Cavolli nuk është më pjesë e stafit të Kardiokirurgjisë në Qendrën Klinike Universitare. Mjeku i cili ishte një ndër themeluesit e Klinikës së Kardiokirurgjisë në vitin 2015 dhe që hyri në histori, ndërsa shpërblehët kështu. Turp për ju”, ka shkruar ndër të tjera deputetja e VV-së.
Reagimeve i është bashkuar edhe zyrtari tjetër i VV-së, Sami Kurteshi. Ai ka thënë se Kosova është duke paguar miliona euro nga buxheti i varfër për shërbime në spitale private, ndërsa mjekët në QKUK diskriminohen.
“Kosova paguan miliona euro nga fondet publike e buxhetet e varfëra private të qytetarëve, për shërbime mjekësore megjithë një personel mjekësor të gatshëm dhe të përgatitur për të ofruar të njëjtat në Kosovë. Me gjasë, kjo shumë e mjeteve financiare të derdhura jashtë Kosovës, është shumëfish më e madhe sesa shuma e investuar për të njëjtat shërbime në spitalet tona. Pse? Kush po e pengon këtë? Cili xhep klanor, politik, a privat mafioz po përfiton nga kjo?”
“Gjithë këtë gjendje të tmerrshme në shëndetësinë tonë e lehtëson vetëm sjellja shumë e njerëzishme, transparenca, gatishmëria për veprim, vetëbesimi dhe siguria në përgatitjen profesionale e personelit mjekësor të diskriminuar në kushte pune dhe kompensimin material nga politika e deritanishme zhvatëse. Kjo sjellje politike shtetërore ndaj shëndetësisë duhet të ndryshojë për të mirë, shumë për të mirë, domosdoshmërisht. Sot!”, ka shkruar Kurteshi.
Kujtojmë se Lëvizja Vetëvendosje dhe Lidhja Demokratike e Kosovës janë duke synuar formimin e qeverisë. Ministria e Shëndetësisë pritet të udhëhiqet nga VV-ja dhe një nga emrat e shumëpërfolur është ish-drejtori i shëndetësisë në komunën e Prishtinës Dr. Arben Vitia. /Gazeta Shneta/