Kompania e shkencës shëndetësore ZOE sapo ka publikuar rezultatet e analizës së tyre më të fundit të të dhënave nga ‘ZOE COVID Study’ një program kërkimor i udhëhequr nga Prof. Tim Spector, nga fusha e epidemiologjisë gjenetike në King’s College në Londër të Mbretërisë së Bashkuar.
Sipas kësaj analize të të dhënave, vetëm 4 në 5 persona që kanë pasur COVID-19 vazhdojnë të zhvillojnë të ashtuquajturat antitrupa anti-N, gjegjësisht antitrupa që njohin një molekulë brenda koronavirusit të quajtur nukleokapsid (N).
Studimi i grupit ‘ZOE COVID’ ekzaminoi të dhënat e futura nga 8,193 kontribues në aplikacionin ZOE, nga të cilët 6,609 (80.67%) rezultuan pozitiv për antitrupa anti-N, sipas një njoftimi për shtyp të parë nga Medical New Today, transmeton Gazeta Shneta.
Kur i ekzaminuan të dhënat më nga afër, shkencëtarët e ZOE zbuluan se njerëzit që kishin më shumë simptoma të COVID-19 kishin më shumë gjasa të kishin fituar antitrupa.
Në të kundërt, njerëzit me kushte themelore shëndetësore ose që pinin duhan kishin më pak gjasa të zhvillonin antitrupa.
Prof. Spector, i cili është gjithashtu bashkëthemelues i ZOE, thotë se:
“Të dhënat tona tregojnë se mënyra më e mirë për të mbrojtur veten dhe të tjerët nga COVID-19, edhe nëse keni pasur virusin më parë, është të keni dy doza të vaksinës dhe dozën përforcuese kur ofrohet dhe të merrni masa paraprake të arsyeshme, si p.sh. mbajtja e një maske.” /Gazeta Shneta/