Ministri i Financave Hekuran Murati ka akuzuar Federatën e Sindikatave të Shëndetësisë se po i shtyn përpara agjendat politike me grevën që do të mbajë nesër. Murati ka thënë se FSSHK ka përfituar mbi 3 milionë euro në pesë vjetët e fundit, por këto para sipas tij nuk dihet ku kanë shkuar
“Në 5 vitet e fundit FSSHK ka pranuar mbi 3 milionë euro në emër të kontributeve që u janë ndalur nga paga personelit shëndetësor dhe u janë transferuar FSSHK-së. Dyshoj se ndonjëherë personeli shëndetësor janë njoftuar se ku kanë shkuar këto para”, ka shkruar Murati, transmeton Gazeta Shneta.
Ai ia ka përmendur tutje FSSHK-së memorandumin që kishte nënshkruar me koalicionin PAN.
“Dhe krahas përfitimeve financiare, ata shtyjnë përpara edhe axhenda politike siç kishin bërë në vazhdimësi me partitë e pushteteve të kaluara kur në kohë fushate nënshkruanin “marrëveshje” të cilat kurrë nuk i zbatuan”, ka deklaruar Murati.
Kujtojmë se FSSHK do të mbajë grevë tetë orëshe nesër me kërkesën për të procedurar Ligjin e Pagave.
Reagimi i plotë i Muratit:
Që nga marrja e mandatit kemi ndarë mbi 30 milionë euro shtesë në shëndetësi, për barna esenciale, luftën ndaj covid 19, dhe së fundmi edhe për shtesat e personelit shëndetësor në vlerë prej 10% të pagës.
Si Qeveri, jemi të përkushtuar që të punojmë për kushte më të mira për të gjithë punonjësit, si në sektorin publik, ashtu edhe privat.
Paralajmërimi i grevave që më shumë kanë synime politike sesa që brengosen për realizimin e të drejtave të personelit shëndetësor, nuk na shpie askund.
Për më tepër, greva e paralajmëruar për nesër nga FSSHK, nuk është në përputhje me legjislacionin në fuqi që rregullon mbajtjen e grevave, saktësisht nenet 6, 7 dhe 15 të ligjit për grevat.
Me qasje të tillë, humbin edhe pacientët edhe personeli shëndetësor.
Kurse ata që paralajmërojnë greva nuk humbin. Përkundrazi, në 5 vitet e fundit FSSHK ka pranuar mbi 3 milionë euro në emër të kontributeve që u janë ndalur nga paga personelit shëndetësor dhe u janë transferuar FSSHK-së. Dyshoj se ndonjëherë personeli shëndetësor janë njoftuar se ku kanë shkuar këto para.
Dhe krahas përfitimeve financiare, ata shtyjnë përpara edhe axhenda politike siç kishin bërë në vazhdimësi me partitë e pushteteve të kaluara kur në kohë fushate nënshkruanin “marrëveshje” të cilat kurrë nuk i zbatuan.
Zaten, nuk ka mundur të ketë shtet të kapur, pa disa sindikata fort të kapura.