Lulzim Syla, kryeinspektor i Inspektoratit të Tregut, është shkarkuar nga pozita e tij, ani pse gjatë këtij viti të njëjtit iu zgjat mandati për katër vite.
Vendimi është marrë përgjatë mbledhjes së Qeverisë gjatë ditës së mërkurë, duke shfuqizuar vendimin nr. 07/67 të datës 26 shkurt të këtij viti nga ish-qeveria Hoti.
Pas vendimit të Qeverisë së Kosovës ka reaguar vet Lulzim Syla. Ai ka thënë se nuk ka marrë asnjë arsyetim për shkarkimin e tij derisa është shprehur se do t’i ndjek rrugët ligjore për shkarkimin e tij.
“Absolutisht nuk e kam marrë asnjë arsyetim, në media u informova, por megjithatë do t’i ndjekë rrugët ligjore sa i përket kësaj çështjeje”, tha Syla për lajmi.net.
Në mbledhjen e 26 shkurtit të vitit 2021, qeveria e Kosovës kishte marrë vendim që Sylës t’i vazhdohej mandati, por i njëjti është shkarkuar sot nga pozita e Kryeinspektorit të Tregut.
Ndryshe Lulzim Syla është vëllai i Blerim Syles, kryetarit të Federatës së Sindikatave të Shëndetësisë. FSSHK ka organizuar grevë tetë orëshe për ditën e nersërme ku po kërkohet procedimi i Ligjit të Pagave.
Ndaj grevës së FSSHK-së ka reaguar sot ministri i Financave Hekuran Murati. Ai ka akuzuar FSSHK-në se po i shtyn përpara agjendat politike, duke ia kujtuar një memorandum që kjo organizatë kishte nënshkruar me koalicionin PAN. Murati poashtu i ka përmendur 3 milionë euro të mbledhura nga FSSHK në pesë vitet e fundit nga punëtorët shëndetësorë, që sipas tij nuk dihet se ku kanë shkuar.
Greva tetë orëshe do të mbahet nesër në të gjitha institucionet shëndetësore nga ora 07:00 deri në 15:00. /Gazeta Shneta/