Norvegjia, të shtunën hoqi kufizimet përfundimtare rreth COVID-19, duke larguar distancimin shoqëror dhe maskat në hapësirat e mbushura me njerëz, pavarësisht nga mundësia e një rritje të infeksioneve Omicron.
“Ne po heqim rekomandimin për distancimin shoqëror,” u tha gazetarëve, kryeministri Jonas Gahr Store në një konferencë për shtyp, shkruan MedicalxPress përcjell Gazeta Shneta.
“Tani ne mund të shoqërohemi si më parë, në jetën e natës, në ngjarje kulturore dhe në raste të tjera sociale,” tha ai.
Norvegjia hoqi shumicën e kufizimeve të tjera rreth COVID-19 në fillim të këtij muaji, duke përfshirë punën në distancë, kufijtë e madhësisë së turmës dhe shitjet e kufizuara të alkoolit në bare dhe restorante.
Kryeministri Gahr Store, theksoi megjithatë se “pandemia nuk ka mbaruar” dhe këshilloi personat e pavaksinuar dhe ata në grupet e rrezikut që të vazhdojnë të praktikojnë distancimin shoqëror dhe të mbajnë maska ku distancimi social nuk është i mundur.
Instituti Norvegjez i Shëndetit Publik (FHI), njoftoi se vendi nuk kishte parë ende kulmin e rritjes së rasteve me Omicron.
Drejtoresha e agjencisë, Camilla Stoltenberg u tha gazetarëve se numri i shtrimeve në spital ishte rritur me 40 për qind javën e kaluar.
Që nga e premtja, 986,851 raste dhe 1,440 vdekje të lidhura me virusin ishin regjistruar në Norvegji, ku më shumë se 91 përqind e popullsisë ka marrë të paktën dy doza të vaksinës.
FHI vlerëson se tre deri në katër milionë njerëz nga një popullsi prej 5.4 milionë banorësh mund të infektohen deri në verën e këtij vitit. /Gazeta Shneta/