Një ceremoni e organizuar nga Oda e Mjekëve të Kosovës (OMK), nën udhëheqjen e kryetarit të saj, Dr. Pleurat Sejdiu, ishte urëlidhëse midis dy spitaleve rajonale, të Gjilanit dhe atë të Prizrenit.
Në këtë ceremoni të pranishëm ishin Dr. Pleurat Sejdiu, kryetari i Odës së Mjekëve, Dr. Arsim Emini, drejtor i Spitalit të Përgjithshëm Gjilan, Dr. Narqize Arënliu – Hoxha, drejtoreshë e Spitalit të Përgjithshëm, Prizren.
“Këto trajnime janë rezultat i aktivitetit të planifikuar në Marrëveshjen e Delegimit të Fondeve dhe Zbatimit ndërmjet Odës së Mjekëve të Kosovës dhe Projektit Zhvillimor të Luksemburgut”, ka thënë kryetari Sejdiu, i cili njëherazi ka falënderuar LuxDev-in për gadishmërinë e realizimit të një projekti të tillë si dhe financimin e trajnimeve të realizuara me qëllim të ngritjeve të kuadrove të stafit shëndetësor.
Kryetari i OMK-se ka paralajmëruar investimin me mbi 300.000 euro në profilizime të mjekëve specialist dhe specializantëve gjatë vitit 2023.
Dr. Narqize Arënliu – Hoxha u shpreh e kënaqur me interesimin e mjekëve për të ndjekur këto trajnime si dhe me institucionet të cilat e bënë të mundur të realizohet ky projekt. Ajo tha se përfituesit e këtij projekti janë mjekët tanë që kanë ndjekur trajnimin dhe tutje pacientët që do të marrin këto shërbime në rajonin e Prizrenit.
Dr. Arsim Emini tha se trajnimet dhe infrastruktua është ndihma që i është kërkuar LuxDev-it si dy hallkat kryesore ku Spitali i Përgjithshëm i Gjilanit ka qenë më dobët. Me këtë rast falënderoi edhe ligjëruesit të cilët ndanë eksperiencat e tyre me mjekët tanë.
U ndanë çertifikatat e mjekëve të cilët morën pjesë në këto trajnime profesionale, të spitalit të Përgjithshëm të Gjilanit dhe mjekëve të Spitalit të Përgjithshëm të Prizrenit.
Kryetari i Odës së Mjekëve, Dr. Pleurat Sejdiu përmbylli ceremoninë ku edhe tha se projekti i OMK-së me mbështetje të Luksemburgut do të jetë me financa më voluminoze për vitet e ardhshme, kjo në varësi se si do të vazhdoj tutje implementimi i këtij projekti. /Gazeta Shneta/