Çaji jeshil është përmendur prej kohësh për përfitime të mundshme shëndetësore.
Tani një studim i ri, shikon ekstraktin e çajit jeshil dhe zbulon se mund të ndihmojë në uljen e niveleve të sheqerit në gjak, shkruan burimi Healthline përcjell Gazeta Shneta. Gjithashtu mund të ulë inflamacionin e zorrëve, sipas hulumtimit.
Çaji jeshil njihet për listën e tij të gjatë të përfitimeve të mundshme shëndetësore, si përmirësimi i funksionit të trurit dhe mbrojtja kundër kancerit.
Tani hulumtimi i ri mbi njerëzit me një sërë faktorësh rreziku për sëmundjet e zemrës po tregon se marrja e ekstraktit të çajit jeshil për katër javë mund të zvogëlojë nivelet e sheqerit në gjak dhe të ulë inflamacionin e zorrëve.
Studiuesit thonë se ky është një nga studimet e para për të vlerësuar nëse rreziqet shëndetësore të lidhura me sindromën metabolike mund të pakësohen nga çaji jeshil.
“Çaji jeshil njihet si një burim i pasur antioksidantësh, substanca që ndihmojnë në luftimin e inflamacionit në trup. Tani po mësojmë më shumë se si çaji jeshil mund të ketë një ndikim pozitiv në zorrë,” tha Dr. Anjali Mone, gastroenterologe në spitalin Lenox Hill.
“Në një studim të ri, studiuesit kërkuan të hetojnë efektet e çajit jeshil në shëndetin e zorrëve. Përshkueshmëria e zorrëve ose “zorra që rrjedh” lejon që bakteret dhe toksinat e tjera të hyjnë në qarkullimin e gjakut duke çuar në inflamacion.
Çfarë gjeti studimi
Ky studim i botuar në “Current Developments in Nutrition”, përfshiu 40 pjesëmarrës, 21 me sindromë metabolike dhe 19 të rritur të shëndetshëm.
Atyre iu dha ekstrakt çaji jeshil për 28 ditë të ndjekur nga një placebo me një muaj pushim nga suplementet ndërmjet trajtimeve.
Studiuesit zbuluan se nivelet e glukozës në gjak esëll tek pjesëmarrësit ishin më të ulëta për ata që merrnin ekstraktin e çajit jeshil në krahasim me placebo.
Trajtimi me çajin jeshil në studim u tregua gjithashtu se zvogëlon inflamacionet e zorrëve të sinjalizuara nga një rënie në proteinat inflamatore të jashtëqitjes.
Bashkautori i studimit, profesor Richard Bruno në Universitetin Shtetëror të Ohajos, tha se:
“Ajo që na tregon kjo është se brenda një muaji ne jemi në gjendje të ulim glukozën në gjak si tek njerëzit me sindromë metabolike ashtu edhe tek njerëzit e shëndetshëm, dhe ulja e glukozës në gjak duket të jetë e lidhur me uljen e inflamacionit të zorrëve – pavarësisht shëndetit”.
Çfarë është sindroma metabolike?
Sindroma metabolike buron nga disa kushte që ndodhin së bashku, të cilat rrisin rrezikun e sëmundjeve të zemrës, goditjes në tru dhe diabetit të tipit 2.
Kushtet përfshijnë rritjen e presionit të gjakut, yndyrën e tepërt rreth belit dhe nivelet jonormale të kolesterolit ose triglicerideve. /Gazeta Shneta/