Vaksina e COVID-19 që u jepet grave shtatzëna nuk dëmton foshnjat e tyre të palindura dhe në fakt mund të ulë rrezikun e komplikimeve serioze tek të sapolindurit, zbulon një studim i ri.
Të porsalindurit e nënave të vaksinuara kishin shkallë më të ulët të dy komplikimeve të lidhura me trurin, hemorragjitë cerebrale dhe mungesën e oksigjenit të trurit, thanë studiuesit në punimin e tyre të botuar me 6 shkurt në “Journal of the American Medical Association”.
“Ne nuk gjetëm rreziqe në rritje,” tha studiuesi kryesor Dr. Mikael Norman, një profesor i pediatrisë dhe neonatologjisë në Institutin Karolinska në Suedi, shkruan burimi Health Day përcjell Gazeta Shneta.
“Nëse asgjë, foshnjat tek gratë e vaksinuara kishin rrezik më të ulët për disa rezultate të rënda.”
Për studimin, studiuesit gjurmuan shëndetin e gati 200,000 të porsalindurve në Suedi dhe Norvegji – 98% e të gjithë foshnjave të lindura në ato vende midis qershorit 2021 dhe janarit 2023.
Rreth gjysma (48%) e nënave të tyre kishin marrë një ose më shumë doza të një vaksine ARNm të COVID-19.
“Studimet e mëparshme kanë treguar se vaksina nuk kalon placentën dhe se nuk mund të gjendet në gjakun e kordonit kërthizor.”
Bazuar në këto rezultate, nënat në pritje të fëmijës duhet të konsiderojnë fuqimisht marrjen e vaksinës COVID-19, tha Dr. Norman.
“COVID-19 është ende i pranishëm në shoqëri dhe ndoshta është diçka me të cilën do të duhet të përballemi për një kohë të gjatë”, tha Dr. Norman.
“Prandaj është shumë e rëndësishme që njëqind mijë gratë që mbesin shtatzënë çdo vit në Suedi dhe 130 milionë në botë, të dinë se vaksinimi me vaksinat ARNm, kundër COVID-19 është i sigurt për foshnjat e tyre”. /Gazeta Shneta/