Shumë prodhues të pijeve joalkoolike riformuluan produktet e tyre pas shpalljes së taksës në vitin 2016, duke ndihmuar në uljen e konsumit të sheqerit të shtuar te fëmijët gjatë tre viteve të ardhshme.
Taksa e sheqerit në Mbretërinë e Bashkuar çoi në një reduktim prej gati 50 për qind të marrjes së sheqerit të shtuar prej pijeve të gazuara dhe pijeve të tjera joalkoolike tek fëmijët, sipas një studimi të ri, raporton Euronews Health përcjell Gazeta Shneta.
Në mars të vitit 2016, qeveria e Mbretërisë së Bashkuar vendosi një taksë për pijet joalkoolike që përmbajnë sheqer të shtuar në një përpjekje për të frenuar mbipeshën e fëmijëve. Rregulli i shtyu prodhuesit e pijeve joalkoolike të ulnin sasinë e sheqerit në pijet e tyre përpara se tatimi të zbatohej në prill 2018.
Konsumi i përgjithshëm i sheqernave të shtuara gjithashtu kishte rënë për vite me radhë, pasi britanikët kaluan në alternativa me më pak sheqer.
Duke parë të dhënat e 11 viteve, studiuesit nga Universiteti i Kembrixhit dhe universitete të tjera të larta britanike zbuluan se pas shpalljes dhe zbatimit të taksës, konsumi i sheqerit të shtuar nga fëmijët vetëm nga pijet joalkoolike ra me 45 për qind krahasuar me vitet e mëparshme.
Marrja e tyre gjithashtu ra me 33 për qind tek të rriturit, sipas studimit, i cili u botua në “Journal of Epidemiology & Community Health”.
Organizata Botërore e Shëndetësisë (OBSH), rekomandon që njerëzit të kufizojnë konsumin e sheqerit në më pak se 5 për qind të marrjes së tyre ditore të energjisë për përfitime maksimale shëndetësore, por në vitin 2019 fëmijët britanikë ende merrnin 9.9 për qind të totalit nga sheqernat e shtuara në ushqim dhe pije te lehta.
Pijet e ëmbla me sheqer i vënë fëmijët në rrezik më të lartë të obezitetit, i cili mund të shkaktojë diabetin e tipit 2, goditje në tru, artritin dhe disa lloje kanceri. /Gazeta Shneta/