Një studim i ri sugjeron se kirurgjia bariatrike mund të jetë më efektive në ruajtjen e funksionit të veshkave te personat me obezitet dhe diabet sesa trajtimi me ilaçet GLP-1.
Sipas hulumtimit nga Cleveland Clinic, personat me obezitet, diabet dhe sëmundje kronike të veshkave kishin një rrezik më të ulët të përparimit të sëmundjes së veshkave pas kirurgjisë bariatrike, krahasuar me ata që u trajtuan me ilaçet GLP-1, shkruan Medical News, transmeton Gazeta Shneta.
Sëmundja kronike e veshkave shpesh zhvillohet si pasojë e diabetit të tipit 2 që prek personat me obezitet dhe është një shkak kryesor i vdekjeve tek ata me diabet.
Kirurgjia bariatrike jo vetëm që zvogëlon madhësinë e stomakut, por gjithashtu shkakton ndryshime metabolike që ulin ndjenjën e urisë dhe përmirësojnë shëndetin e përgjithshëm.
Studimi përfshiu 425 pjesëmarrës, ku 183 prej tyre iu nënshtruan kirurgjisë bariatrike, ndërsa 242 u trajtuan me ilaçet GLP-1 për diabetin, të cilat gjithashtu ndihmojnë në humbjen e peshës. Rezultatet treguan se ata që iu nënshtruan kirurgjisë kishin 60% më pak rrezik të përparimit të dëmtimit të veshkave dhe 44% më pak rrezik të dështimit të veshkave ose vdekjes.
Ky studim, i cili u publikua në revistën Annals of Surgery, thekson rëndësinë e kirurgjisë bariatrike në parandalimin e përparimit të sëmundjeve të veshkave dhe komplikimeve të tjera të lidhura me obezitetin dhe diabetin./Gazeta Shneta/