Në një zhvillim të rëndësishëm për trajtimin e pacientëve me diabet, disa shoqata mjekësore amerikane njoftuan së fundmi se ndërprerja e medikamenteve antidiabetike, si ato të grupit GLP-1, para ndërhyrjeve kirurgjikale nuk është gjithmonë e domosdoshme. Ky ndryshim mbështetet në një studim të ri, i prezantuar në një konferencë ndërkombëtare të specialistëve gastrointestinal në SHBA.
Studimi analizoi të dhëna nga 35 kërkime që përfshinë mbi 714,000 pacientë të cilët iu nënshtruan procedurave endoskopike gastrointestinale. Rezultatet treguan se përdorimi i barnave GLP-1 nuk rriti rrezikun e aspirimit (thithjes së përmbajtjes gastrike) gjatë anestezisë. Megjithatë, te pacientët që nuk ndërprenë medikamentet, kishte një tendencë më të lartë për prani të ushqimit të mbetur në stomak, duke e bërë të nevojshme përsëritjen e disa procedurave, shkruan NIH, transmeton Gazeta Shneta.
Një aspekt tjetër i rëndësishëm i studimit ishte ndikimi i një diete me bazë lëngjesh të pastër për 24 orë para operacionit. Te pacientët që ndoqën këtë dietë, prania e përmbajtjes gastrike të mbetur u reduktua ndjeshëm, duke eliminuar nevojën për të ndërprerë barnat GLP-1.
Barnat GLP-1 ngadalësojnë zbrazjen e stomakut, çka i bën kirurgët të rekomandojnë ndërprerjen e tyre para ndërhyrjeve. Megjithatë, ky studim i fundit sugjeron se me përgatitje të duhur, si dieta me lëngje, mund të shmanget ndërprerja e barnave, duke siguruar menaxhim të vazhdueshëm të diabetit dhe reduktimin e komplikimeve kirurgjikale.
Këto rezultate janë një hap i rëndësishëm drejt trajtimeve më të sigurta dhe të personalizuara për pacientët me diabet. Në vend të ndalimit të barnave jetike, mjekët tani mund të fokusohen në përgatitje më të kujdesshme para procedurave kirurgjikale dhe endoskopike./ Gazeta Shneta/