Një studim i kryer në modele kafshësh sugjeron se fruktoza dietike mund të kontribuojë në rritjen e tumorëve të kancerit.
Fruktoza është një sheqer natyral që gjendet në fruta, perime dhe mjaltë. Megjithatë, konsumimi i saj në sasi të mëdha përmes shurupit me përmbajtje të lartë fruktoze, i pranishëm në ushqime të përpunuara, mund të jetë i dëmshëm për shëndetin, shkruan Medical News, transmeton Gazeta Shneta.
Studime të mëparshme kanë lidhur marrjen e lartë të fruktozës nga ushqimet e përpunuara me rritjen e rrezikut për:
- Sëmundjen e Alzheimerit;
- Diabetin e tipit 2;
- Sëmundjen e mëlçisë yndyrore;
- Sëmundjet e veshkave;
- Kancerin.
Çfarë tregon studimi i fundit?
Hulumtuesit nga Universiteti i Uashingtonit në St. Louis kanë zbuluar se fruktoza dietike mund të nxisë rritjen e tumorëve në modelet e kancerit të lëkurës (melanoma), gjirit dhe qafës së mitrës.
Sipas Dr. Gary Patti, profesor i kimisë, gjenetikës dhe mjekësisë në këtë universitet, përdorimi i fruktozës si ëmbëltues artificial në ushqimet e përpunuara ka rritur ndjeshëm ekspozimin ndaj këtij sheqeri në dekadat e fundit.
Fruktoza natyrale, kur merret nga burime të tilla si mollët apo hurmat, nuk konsiderohet e dëmshme për shëndetin. Por kur konsumohet përmes pijeve me gaz, ëmbëlsirave të paketuara dhe ushqimeve të tjera të përpunuara, ajo mund të kontribuojë në zhvillimin e sëmundjeve kronike dhe tumorëve.
Studimi i ri është botuar në revistën shkencore Nature dhe përfaqëson një hap të rëndësishëm në kuptimin e lidhjes mes dietës dhe kancerit. /Gazeta Shneta/