Një studim i ri nga University College London ka zbuluar se ushtrimet fizike dhe gjumi i thellë jo vetëm që përmirësojnë performancën njohëse, por edhe e zgjasin këtë efekt deri në 24 orë.
Hulumtimet e mëparshme kanë treguar se aktiviteti fizik mund të ulë rrezikun e demencës, përfshirë Alzheimerin, dhe të ngadalësojë rënien njohëse. Në përgjithësi, efektet pozitive të ushtrimeve fizike në tru mendohej se arrinin kulmin brenda 10-20 minutave të para pas ushtrimeve, shkruan Medical News, transmeton Gazeta Shneta.
Studimi i ri tregon se ky “shtysë” për funksionet e trurit mund të zgjasë më shumë, duke përmirësuar kujtesën dhe përqendrimin gjatë gjithë ditës pas ushtrimeve.
Përveç ushtrimeve fizike, shkencëtarët zbuluan një lidhje midis qëndrimit ulur dhe performancës më të mirë në testet e kujtesës. Gjithashtu, ata theksuan rëndësinë e gjumit cilësor, veçanërisht fazat e gjumit të thellë dhe REM. Gjumë i mjaftueshëm — të paktën 6 orë në natë — u tregua i lidhur me rezultate më të mira në testet njohëse të ditës së ardhshme.
Sipas rezultateve, kombinimi i aktivitetit fizik të rregullt dhe gjumit të mirë krijon një efekt të fuqishëm që ndikon pozitivisht në performancën e trurit, duke përfshirë kujtesën, aftësinë për të mësuar dhe përqendrimin. Këto gjetje nënvizojnë rëndësinë e një stili jetese aktiv dhe një rutine të mirë të gjumit për shëndetin e trurit.
Ky studim, i botuar në International Journal of Behavioral Nutrition and Physical Activity, thekson rëndësinë e ushtrimeve të rregullta dhe gjumit cilësor për të mbështetur funksionet njohëse dhe për të mbrojtur shëndetin e trurit. Për një tru të shëndetshëm, ekspertët këshillojnë:
- Aktivitet fizik të rregullt, duke përfshirë ushtrime aerobike dhe forcë.
- Kufizim të kohës së kaluar ulur gjatë ditës.
- Të paktën 6 orë gjumë të pandërprerë, duke synuar fazat REM dhe të gjumit të thellë. /Gazeta Shneta/