Një orë ushtrime me intensitet të moderuar uli ndjesinë e urisë tek personat me mbipeshë dhe obezitet, sipas një studimi të ri.
Autorët e studimit ia atribuojnë këtë ulje të urisë ndryshimeve në nivelet e disa peptideve të lidhura me oreksin, të cilat prodhohen nga muskujt gjatë ushtrimeve fizike, shkruan burimi Medical News Today përcjell Gazeta Shneta.
Hulumtimet sugjerojnë se trupat e personave me mbipeshë ose obezitet reagojnë ndryshe ndaj përpjekjeve fizike, dhe shtypja e urisë mund të jetë një nga këto efekte të veçanta.
Megjithëse nuk është një ulje e oreksit aq drastike sa ajo që shkaktohet nga medikamentet GLP-1, studimi i ri sugjeron se ushtrimet fizike mund të ndihmojnë personat me mbipeshë dhe obezitet në kontrollin e oreksit.
Ushtrimet me intensitet të moderuar duket se kanë çuar në një reduktim të oreksit tek personat me mbipeshë dhe obezitet, sipas një studimi të kryer nga studiues nga Irani dhe Australia.
Studimi i publikuar në revistën “Physiological Reports” — zbuloi se proteinat që lidhen me shtypjen e oreksit u rritën menjëherë pas një seance ushtrimesh një-orëshe, ndërkohë që u vu re një ulje e një hormoni që stimulon oreksin. Këto peptide prodhohen nga muskujt gjatë aktivitetit fizik.
Inhibitorët e oreksit që u rritën ishin proteina citokinike interleukina 6 (IL-6) dhe proteina e ngjashme me hormonin, irisin, ndërsa nivelet e hormonit neuropeptid Y (NPY), një stimulues i oreksit, kishin pësuar rënie.
Studimi, i kryer në Iran, përfshiu njëmbëdhjetë meshkuj me obezitet, të cilët ishin metabolikisht të shëndetshëm, jo-duhanpirës, nuk përdornin medikamente dhe kishin një stil jetese joaktiv, sipas pyetësorit “International Physical Activity Questionnaire”. /Gazeta Shneta/