Shtrimi në spital për COVID-in ose gripin mund të rrezikojë seriozisht shëndetin e zemrës, sugjeron një studim i ri.
Të rriturit që janë shtruar në spital për një infeksion të rëndë kanë më shumë se dyfish mundësi të zhvillojnë dështim të zemrës disa vjet më vonë, sipas gjetjeve të publikuara më 30 janar në “Journal of the American Heart Association”, shkruan burimi Health Day përcjell Gazeta Shneta.
Rezultatet theksojnë rëndësinë e marrjes së vaksinave të rekomanduara dhe mbrojtjes së vetvetes gjatë sezonit të ftohjes dhe gripit, thanë ekspertët.
“Këto janë gjetje që kërkojnë vëmendje,” tha Sean Coady nga Instituti i Shëndetësisë Publik, Maryland, SHBA.
“Ndërkohë që tashmë ekziston një bazë e arsyeshme e dëshmive që lidh infeksionet e mëparshme me sulmin në zemër, ky studim është fokusuar te dështimi i zemrës, një çështje që është studiuar më pak, megjithëse preken rreth gjashtë milionë amerikanë,” shtoi Coady.
Për këtë studim, studiuesit ndoqën rreth 14,500 të rritur nga mosha 45 deri në 64 vjeç për deri në 31 vjet, nga 1987 deri në 2018. Asnjë prej tyre nuk kishte dështim të zemrës kur nisi studimi.
Personat që u shtruan në spital për shkak të një infeksioni kishin 2.35 herë më shumë mundësi për të zhvilluar dështim të zemrës, mesatarisht rreth shtatë vjet pas sëmundjes së parë, tregojnë rezultatet.
Lidhja me dështimin e zemrës ishte e qëndrueshme, pavarësisht llojit të infeksionit që i dërgoi një person në spital.
Këto përfshinin infeksione të frymëmarrjes, infeksione të traktit urinar, infeksione të gjakut dhe infeksione që ndodhin gjatë qëndrimit në spital për një sëmundje tjetër, zbulon studimi. /Gazeta Shneta/