Administrata Amerikane e Ushqimit dhe Barnave (FDA) miratoi së fundmi një ilaç të ri për trajtimin e kancerit të gjirit hormon-receptor (HR)-pozitiv dhe HER2-negativ që nuk mund të operohet ose është metastatik. Ky lloj kanceri është rreth 70% e rasteve të kancerit të gjirit.
Ilaçi, i quajtur Datroway (me substancë aktive datopotamab deruxtecan), është një ilaç kimoterapie që vepron si një “raketë e drejtuar” për të dërguar trajtimin direkt në qelizat kancerogjene, duke pasur më pak efekte anësore në trupin e pacientëve, shkruan burimi Very Well Health përcjell Gazeta Shneta.
Ky ilaç është miratuar për ata që kanë marrë trajtime të tjera dhe nuk kanë pasur sukses. Datroway është i dyti në një grup ilaçesh të quajtur konjugate ilaç-antitrup (ADC), që janë një lloj i ri i terapive.
Në një studim, pacientët që përdorën Datroway jetuan rreth tetë javë më shumë pa përkeqësimin e kancerit në krahasim me ata që përdorën kimoterapi të zakonshme. Ata gjithashtu patën më pak efekte anësore të rënda.
Ky ilaç i ri është një hap përpara për ata që vuajnë nga kanceri i gjirit metastatik HR-pozitiv, HER2-negativ, pasi ofron një mundësi të re trajtimi dhe shpresë për pacientët që nuk kanë pasur mundësi të tjera.
Datroway vepron duke përdorur një antitrup që synon një proteinë që është në sipërfaqen e qelizave të kancerit. Ky ilaç është një mundësi e re dhe mund të ofrojë një trajtim më të sigurt dhe efektiv për shumë pacientë. /Gazeta Shneta/