Ish-infermierja Shaha Loshi, e cila prej kohësh po përballet me një sëmundje të rëndë, ka bërë një thirrje publike për ndihmë, duke kërkuar solidaritetin e njerëzve bamirës për të vijuar trajtimin e saj onkologjik në Turqi.
Loshi, e cila tashmë ka ndjekur disa cikle të kimioterapisë, ka treguar përmirësime të dukshme falë trajtimit, por për të siguruar një shërim të plotë, mjekët i kanë rekomanduar edhe gjashtë cikle të tjera. Megjithatë, kostoja e këtij trajtimi mbetet e papërballueshme për të, duke e vënë përballë një sfide të madhe financiare, transmeton Gazeta Shneta.
“Ndjej keqardhje që jam e detyruar të dal sërish në media dhe të kërkoj ndihmë, por nuk kam zgjidhje tjetër. Dua të shmang periudhën e rëndë të sëmundjes nga e cila kalova një vit më parë”, shprehet.
Ajo shpreh mirënjohjen për mirëkuptimin dhe ndihmën e deritanishme, duke shpresuar që edhe kësaj here të mund të sigurojë mbështetjen e nevojshme për të vazhduar me trajtimin jetik.
Ata që dëshirojnë të kontribuojnë për shërimin e saj, mund ta ndihmojnë përmes llogarisë bankare që ajo ka bashkangjitur në postim.
Postimi i plotë:
Të nderuar dhe të respektuar miqë
Sinqërisht kërkoj falje për këtë postim të detyruar, por të gjithë ata që më njohin, tashmë janë në dituri për gjendjën time shëndetësore. Desha të ju njoftoj që unë jam ende duke u trajtuar me kimioterapi në Turqi.
Në fakt, për momentin, kjo terapi po ka sukses, prandaj edhe onkologet më kanë rekomanduar që të vazhdoj plr së paku edhe 6 cikle me këtë terapi (e cila fatkeqësisht e ka një shumë të pa përballueshme për mua), përndryshe nëse nuk vazhdoj do të kthehem prapë në fazën fillestare.
Unë jam e detyruar që prapë të dalë në media dhe të kërkoj ndihmë nga njerëzit bamirës dhe t’i shmangëm përiudhës së rëndë të sëmundjës në të cilën unë isha para një viti.
Kërkoj falje për shqetësim dhe ju falënderoj shumë për mirëkuptim.