Një studim i udhëhequr nga Instituti për Shëndetin Global të Barcelonës (ISGlobal) ka treguar se Evropa ka arritur të përshtatet më mirë me temperaturat e ulëta sesa me ato të larta gjatë dy dekadave të fundit.
Hulumtimi, i kryer në bashkëpunim me Qendrën e Superkompjuterëve të Barcelonës (BSC) dhe i publikuar në The Lancet Planetary Health, tregon se rreziku i vdekjes nga të ftohtit ka rënë ndjeshëm, ndërsa rreziku i vdekjes nga të nxehtit ka pësuar një rënie më të vogël.
Duke analizuar të dhënat për temperaturën dhe vdekjet nga më shumë se 800 rajone në 35 shtete evropiane gjatë periudhës 2003-2020, studiuesit zbuluan se rreziku i vdekjes në temperaturat më të ulëta ka rënë me 2% në vit, ndërsa rreziku në temperaturat më të larta ka rënë me 1% në vit, shkruan MedicalXpress transmeton Gazeta Shneta.
Ata zhvilluan një qasje të re, duke përdorur konceptin e Temperaturës së Rrezikut Ekstrem (ERT) për të llogaritur temperaturën ku rreziku i vdekjes kalon një kufi të caktuar për çdo rajon.
Nga 2003 deri në 2020, Evropa ka pasur mesatarisht 2.07 ditë më pak me temperatura të rrezikshme të ftohta çdo vit, ndërsa ditët me temperatura të rrezikshme të nxehta janë rritur me 0.28 ditë në vit.
Megjithatë, rajonet juglindore të Evropës, edhe pse më të ngrohta, kanë pasur më shumë ditë me temperatura të rrezikshme dhe një rrezik më të lartë vdekshmërie.
Studimi gjithashtu vuri në dukje se, përveç temperaturave, ndotja e ajrit është një faktor tjetër që ndikon në shëndet, pasi ditët me temperatura të rrezikshme shpesh përkojnë me nivele të larta ndotjeje.
Kjo ndodhi në 60% të ditëve me temperatura të rrezikshme të nxehta dhe 65% të ditëve me temperatura të rrezikshme të ftohta./Gazeta Shneta/