Një studim i ri sugjeron se ekspozimi në moshë të hershme ndaj grimcave të imta të ndotjes së ajrit dhe ndriçimit artificial gjatë natës rrit rrezikun për kancer papilar të tiroides tek fëmijët dhe të rinjtë.
Ekspozimi ndaj dy ndotësve të zakonshëm në mjedis mund të jetë duke kontribuar në rritjen e një prej llojeve të kancerit që po rritet me shpejtësi te fëmijët dhe te të rinjtë, shkruan burimi Health Day përcjell Gazeta Shneta.
Studiuesit zbuluan se ekspozimi i hershëm ndaj ndotjes së ajrit me grimca të imta (PM2.5) dhe ndaj dritës artificiale të jashtme gjatë natës mund të rrisë rrezikun për kancer të tiroides tek të rinjtë.
Autori kryesor i studimit tha se: “Këto rezultate janë shqetësuese, veçanërisht duke pasur parasysh sa të përhapura janë këto ekspozime.”
Grimcat e imta të ndotjes çlirohen në ajër nga gazrat e makinave dhe aktivitetet industriale, ndërsa ndriçimi artificial i jashtëm gjatë natës është shumë i zakonshëm në zonat e populluara.
Studiuesit analizuan të dhënat e 736 personave të diagnostikuar me kancer papilar të tiroides para moshës 20-vjeçe dhe i krahasuan me gati 37,000 persona të tjerë të ngjashëm për moshë dhe vendbanim.
Ata vlerësuan ekspozimin ndaj ndotësve në bazë të vendit të lindjes dhe zbuluan se personat e ekspozuar ndaj niveleve më të larta të ndotjes me grimca të imta kishin shanse dukshëm më të larta për të zhvilluar kancer të tiroides.
Asociacioni më i fortë u gjet tek adoleshentët e moshës 15–19 vjeç dhe tek fëmijët hispanikë.
Fëmijët e lindur në zona me ndriçim të lartë artificial gjatë natës kishin gjithashtu 23–25% më shumë gjasa për të zhvilluar këtë lloj kanceri, sipas rezultateve.
Autorët theksojnë se, ndonëse nevojiten më shumë kërkime, reduktimi i ndotjes së ajrit dhe i ndriçimit artificial mund të jenë hapa të rëndësishëm për mbrojtjen e shëndetit të fëmijëve.
Ky studim u publikua në revistën “Environmental Health Perspectives”. /Gazeta Shneta/