Komisioni Evropian ka kritikuar një hetim të fundit nga SHBA për importet farmaceutike, duke e cilësuar si një hap të pajustifikuar drejt vendosjes së mundshme të tarifave që mund të dëmtojnë sistemet shëndetësore si në Evropë ashtu edhe në Amerikë.
Në fillim të këtij muaji, administrata Trump nisi një hetim mbi importet farmaceutike bazuar në Nenin 232 të Ligjit për Zgjerimin e Tregtisë të vitit 1962, i cili lejon vendosjen e tarifave ndaj importeve që konsiderohen si kërcënim për sigurinë kombëtare.
Megjithëse tarifat ende nuk janë zbatuar, zyrtarët e BE-së janë të shqetësuar se hetimi është një pararendës i një veprimi tregtar, raporton Euronews Health përcjell Gazeta Shneta.
“Nuk pajtohemi me këtë hetim,” tha Elena Kamilarova, zyrtare për tregtinë në Komisionin Evropian, gjatë një eventi në Bruksel. “[Nuk pajtohemi] as me mjetin e përdorur dhe as me vetë konceptin, pra me idenë se importet e barnave mund të paraqesin rrezik për sigurinë kombëtare.”
Kompanitë farmaceutike nga të dyja anët e Atlantikut kanë shprehur shqetësim për pasojat e mundshme të tarifave amerikane, duke paralajmëruar rritje të çmimeve të barnave dhe ndërprerje të zinxhirëve global të furnizimit.
Këto shqetësime janë veçanërisht të theksuara për Irlandën, ku ndodhen kapacitete të mëdha prodhuese të kompanive amerikane si Pfizer, Johnson & Johnson dhe Eli Lilly.
Gjermani, Belgjika dhe Danimarka janë gjithashtu eksportues kyç.
Në vitin 2024, barnat ishin eksporti më i madh i BE-së drejt SHBA-së, me një vlerë prej 127 miliardë dollarësh (117 miliardë euro), shifër që tashmë rrezikohet për shkak të hetimit në vazhdim. Furnizimi me barna është në rrezik ndërprerjeje, me pasoja potencialisht serioze për pacientët dhe bizneset.
Edhe Thibaut L’Ortye nga Dhoma Amerikane e Tregtisë në BE shprehu shqetësim për hetimin, duke thënë se nisja e tij nuk gëzon mbështetjen e bizneseve amerikane dhe mund të tensionojë më tej marrëdhëniet tregtare transatlantike.
BE-ja ka paralajmëruar se çdo lëvizje drejt tarifave mund të dëmtojë qasjen në barnat thelbësore, të shkaktojë mungesa dhe të rrisë kostot e kujdesit shëndetësor në të dy kontinentet. /Gazeta Shneta/