Gratë e moshës së mesme që përjetojnë pagjumësi mund të jenë në rrezik më të lartë për të zhvilluar sëmundje kardiovaskulare, sipas një studimi të ri të publikuar në revistën “Circulation”. Studimi përfshiu 2,964 gra të moshës 42–52 vjeç, të cilat nuk kishin histori të mëparshme të sëmundjeve të zemrës dhe nuk përdornin terapi hormonale.
Pjesëmarrëset u ndoqën për një periudhë prej 22 vitesh, duke iu nënshtruar vlerësimeve të rregullta për simptomat e pagjumësisë, depresionit dhe ngjarjeve kardiovaskulare si sulmet në zemër, goditjet në tru dhe dështimi i zemrës, shkruan burimi Health News përcjell Gazeta Shneta.
Gati 23% kishin simptoma të vazhdueshme të pagjumësisë, ndërsa 39% kishin simptoma të ulëta. Tek ato me pagjumësi të vazhdueshme, u vërejt një rritje prej 70% e rrezikut për sëmundje të zemrës. Kur kjo gjendje shoqërohej edhe me gjumë të pakët, rreziku rritej në 75%.
Sipas autores së studimit, Dr. Rebecca Thurston nga Universiteti i Pitsburgut, këto gjetje theksojnë nevojën për të trajtuar problemet me gjumin si pjesë e strategjive për ruajtjen e shëndetit të zemrës së grave.
Pagjumësia nuk lidhet vetëm me rrezikun për sëmundje kardiovaskulare, por edhe me çrregullime të tjera si depresioni, ankthi, presioni i lartë i gjakut, diabeti i tipit 2, obeziteti dhe psikozat.
Studimi nënvizon rëndësinë e ndërhyrjeve të hershme për të përmirësuar cilësinë e gjumit dhe për të parandaluar pasoja të rënda shëndetësore tek gratë në këtë grupmoshë. /Gazeta Shneta/