Një studim i ri i publikuar në European Heart Journal tregon se personat që zhvillojnë diabet të tipit 1 në moshë të rritur kanë një rrezik më të lartë për sëmundje kardiovaskulare dhe vdekje, dhe se ata që diagnostikohen më vonë nuk kanë një prognozë më të mirë sesa ata që diagnostikohen më herët.
Studimi, i realizuar nga studiues të Institutit Karolinska në Suedi, thekson se pirja e duhanit, kontrolli i dobët i glukozës dhe mbipesha janë faktorët kryesorë të rrezikut.
Diabeti i tipit 1 dikur quhej “diabet i fëmijërisë”, por mund të shfaqet në çdo fazë të jetës. Megjithatë, hulumtimet për diabetin e tipit 1 me fillim të vonshëm janë të kufizuara. Studiuesit e këtij studimi synuan të analizojnë rrezikun për sëmundje kardiovaskulare dhe vdekje në këtë grup, veçanërisht tek ata që diagnostikohen pas moshës 40 vjeç, përcjell Gazeta Shneta.
Studimi i bazuar në të dhëna regjistruese identifikoi 10,184 persona të diagnostikuar me diabet të tipit 1 në moshë të rritur midis viteve 2001 dhe 2020, dhe i krahasoi ata me 509,172 persona në një grup kontrolli.
Rezultatet treguan se këta persona kishin një rrezik më të lartë për sëmundje të zemrës dhe për vdekje nga të gjitha shkaqet – përfshirë kancerin dhe infeksionet – krahasuar me grupin kontrollues.
Studiuesit theksojnë se diabeti i tipit 1 mbetet një sëmundje serioze edhe kur shfaqet më vonë në jetë.
Studiuesit kanë në plan të vazhdojnë kërkimet mbi diabetin e tipit 1 në moshë të rritur, duke përfshirë faktorët e rrezikut për zhvillimin e sëmundjes dhe prognozën për komplikime të tjera, si ato mikrovaskulare.
Gjithashtu, duhet shqyrtuar më tej trajtimi optimal për këtë grup pacientësh, përfshirë ndikimin e përdorimit të pompës së insulinës dhe teknologjive të tjera të avancuara./Gazeta Shneta/