Një studim i ri ndërkombëtar i udhëhequr nga Universiteti i Exeter ka zbuluar se njerëzit që jetojnë në lagje me më shumë hapësira të gjelbra kanë më pak gjasa të pijnë duhan ose të konsumojnë alkool çdo ditë.
Sipas të dhënave nga 18 vende të ndryshme, banorët e zonave më të gjelbra ishin 13% më pak të prirë të ishin duhanpirës aktivë dhe 31% më pak të prirë të konsumonin alkool çdo ditë.
Studiuesit theksojnë se këto përfitime nuk janë të kufizuara vetëm te grupet me të ardhura më të larta ose arsim më të lartë – efektet pozitive shfaqen në të gjitha grupet shoqërore, transmeton Gazeta Shneta.
Gjithashtu, ata që vizitojnë natyrën rregullisht, të paktën një herë në javë, kanë më pak gjasa të pijnë duhan, pavarësisht nëse banojnë në zona urbane me më pak gjelbërim.
Studiuesit sugjerojnë se kontaktet me natyrën mund të ndihmojnë në uljen e dëshirës për substanca si nikotina apo alkooli, për shkak të ndikimit qetësues që ofron natyra.
Ky hulumtim hap rrugë për përdorimin e hapësirave të gjelbra urbane si ndërhyrje të mundshme për përmirësimin e shëndetit publik dhe uljen e sjelljeve të rrezikshme për shëndetin./Gazeta Shneta/