Një studim i ri nga Universiteti Columbia nxjerr në pah një boshllëk serioz në planet globale të shëndetit për valët e nxehtësisë.
Edhe pse shumica e këtyre planeve njohin rreziqet për shëndetin mendor si ankthi, depresioni dhe vetëvrasjet, shumë pak prej tyre përfshijnë masa konkrete për të mbrojtur personat më të rrezikuar.
Analiza e 83 planeve nga 24 vende tregon se vetëm 21.7% parashikojnë ndërhyrje specifike për pasojat mendore të nxehtësisë ekstreme, shkruan MedicalXpress, transmeton Gazeta Shneta.
Shumë prej tyre nuk trajtojnë çështje thelbësore si stresi ekonomik, zhvendosjet e detyruara apo shqetësimet për gjumin, ndërsa mungojnë edhe strategjitë komunitare për mbështetje, si kontrolli nga fqinjët në periudha të nxehtësisë së lartë.
Ekspertët theksojnë se këto plane duhet të kombinojnë kujdesin mjekësor me strategji sociale, për të ndihmuar njerëzit vulnerabël të përballojnë më mirë valët ekstreme të nxehtësisë, që po bëhen gjithnjë e më të shpeshta me ndryshimet klimatike./Gazeta Shneta/