Eklipsi i rrallë total diellor më 8 prill 2024 tërhoqi vëmendjen e miliona qytetarëve në Quebec, por për dy prej tyre një burrë 34-vjeçar dhe një vajzë 17-vjeçare ky spektakël qiellor përfundoi me dëmtime të përhershme të retinës, pasi e vështruan diellin pa mbrojtje adekuate.
Raste këto të raportuara nga një regjistër i posaçëm i Shoqatës së Oftalmologëve të Quebec-ut (AMOQ), në bashkëpunim me specialistët e retinës nga Qendra Spitalore Universitare e Montrealit (CHUM).
Burri e vështroi eklipsin për 30 sekonda përmes një dritareje, ndërsa vajza përdori vetëm një sy pa syze mbrojtëse. Të dy kërkuan ndihmë mjekësore disa javë më vonë për probleme me shikimin, shkruan MedicalXpress transmeton Gazeta Shneta.
Ekzaminimet zbuluan dëmtime në foveë – pjesa qendrore e retinës që është përgjegjëse për shikimin e detajuar.
Sipas mjekëve, dëmtimet në qelizat fotoreceptore janë të pakthyeshme dhe të rënda në nivelin mikroskopik, edhe nëse simptomat ishin fillimisht të lehta.
Dr. Fares Antaki nga CHUM tha se megjithëse vetëm dy raste janë konfirmuar zyrtarisht, numri real mund të jetë shumë më i lartë, për shkak të mungesës së raportimeve nga optometristët dhe pacientët që nuk kanë kërkuar ndihmë.
Ai theksoi gjithashtu rëndësinë e fushatave ndërgjegjësuese për shëndetin e syve, të cilat duhet të përsëriten në të ardhmen – megjithëse Quebec do të përjetojë eklipsin tjetër total vetëm në vitin 2106./Gazeta Shneta/