Në javën e 25-të të shtatzënisë, me shumë gjasë ndjen lëvizje të rregullta të foshnjës – si goditje apo kërcime në reagim ndaj zhurmave të forta.
Në këtë fazë, barku yt ka përmasën e një topi futbolli. Je në mes të tremujorit të dytë, një periudhë ku shumica e grave ndihen më mirë – zakonisht është zhdukur përzierja e mëngjesit dhe ende nuk ka nisur lodhja e tremujorit të fundit, shkruan burimi Medical News Today transmeton Gazeta Shneta.
Megjithatë, mund të përjetosh disa shqetësime si:
– kapsllëk, hemorroide;
– urth, fryrje dhe dhimbje të legenit;
– ënjtje në duar e këmbë;
– rritje të shpejtë të flokëve e thonjve;
– sindroma e tunelit karpal, gërhitje apo shqetësime gjatë gjumit;
– Për rehati, mund të përdorësh rripa mbështetës për barkun apo sutjena për shtatzëni.
Shtimi në peshë:
Sasia e kilogramëve që pritet të shtosh varet nga indeksi yt i masës trupore (BMI) para shtatzënisë. P.sh.:
- BMI nën 18.5: +12.5–18 kg;
- BMI normal: +11.5–16 kg;
- BMI mbi 25: +7–11.5 kg;
- BMI mbi 30: +5–9 kg;
Rritja e tepërt ose e pamjaftueshme në peshë mund të jetë shenjë e problemeve si preeklampsia, diabeti gestacional apo kequshqyerja.
Ndryshimet hormonale
Luhatjet hormonale mund të sjellin ndryshime emocionale. Edhe pse zakonisht më të qëndrueshme në tremujorin e dytë, disa gra ndihen ende të shqetësuara. Ushqimi i shëndetshëm, aktiviteti fizik i moderuar dhe gjumi i mjaftueshëm ndihmojnë.
Zhvillimi i foshnjës
Foshnja është tani rreth 23 cm dhe peshon më shumë se 700 g. Hap qepallat për herë të parë, i zhvillohen mushkëritë dhe sistemi tretës, por nuk janë ende të pjekur. Zhvillimi i sistemit dëgjimor, pamor dhe i kapilarëve është në vijim. Rrahjet e zemrës janë rreth 140 në minutë.
Kontrollet shëndetësore
Mjeku mund të të rekomandojë testin e sheqerit në gjak për të kontrolluar për diabetin e shtatzënisë. Nëse rezulton pozitiv, do të kesh nevojë për një test të dytë dhe ndoshta edhe për ndryshime në dietë dhe stil jetese.
Ndryshime në stilin e jetesës
Vazhdo të kujdesesh për shëndetin tënd të përgjithshëm duke ngrënë ushqime të balancuara, duke ushtruar rregullisht dhe duke shmangur substancat e dëmshme si alkooli dhe duhani.
Ky është momenti i duhur për të menduar për ndjekjen e kurseve përgatitore për lindje. Konsultohu me profesionistin shëndetësor për të mësuar se cilat mundësi ofrohen në zonën tënde.
Gjithashtu, fillo ushtrimet kegel – ushtrime për muskujt e legenit. Ato ndihmojnë në forcimin e muskujve që do të përdoren gjatë lindjes dhe mund të parandalojnë rrjedhjen e pavullnetshme të urinës pas lindjes. /Gazeta Shneta/