Ekspozimi afatgjatë ndaj niveleve më të larta të ndotjes së ajrit lidhet me një rrezik më të lartë për meningiomën, një lloj tumori truri që zakonisht nuk është kancerogjen, por mund të shkaktojë probleme të tjera shëndetësore.
Meningiomat janë lloji më i zakonshëm i tumoreve primare të trurit dhe rriten ngadalë, duke bërë që shpesh të kalojnë vite deri sa të zbulohen. Ato fillojnë në membranat që rrethojnë trurin dhe palcën kurrizore.
Më së rrallë janë kancerogjene, por mund të shkaktojnë aftësi të kufizuara duke prekur indet, nervat ose enët pranë, shkruan burimi Euronews Health transmeton Gazeta Shneta.
Në studim u ndoqën afro katër milionë të rritur në Danimarkë për 21 vjet. Rreth 16,600 persona zhvilluan tumore në sistemin nervor qendror, përfshirë 4,600 me meningiomë.
Studiuesit vlerësuan ekspozimin ndaj ndotjes së ndryshme të ajrit, si emetimet e trafikut dhe ndotja nga dizeli, gjatë një dekade.
Ata gjetën se personat me ekspozim më të madh ndaj ndotjes kishin rrezik më të lartë për meningiomë, por nuk u gjet lidhje e fortë me tumoret më agresive, si gliomat.
Rreziqet më të mëdha vinin nga grimcat ultra të imëta të shkaktuara nga tymi, shkarkimet e makinave dhe emetimet.
Studimi nuk provon se ndotja e ajrit shkakton meningiomë, vetëm tregon lidhje mes tyre.
Megjithatë, shton dëshmi për efektet negative të ndotjes në shëndet. Hulumtime të tjera tregojnë se grimcat ultra të imëta mund të kalojnë pengesën gjak-tru dhe të dëmtojnë indet cerebrale.
Studimi u botua në revistën “Neurology”, të Akademisë Amerikane të Neurologjisë. /Gazeta Shneta/