Një baktere e rrallë që “ha mish” ka vrarë të paktën katër persona në Florida këtë vit, kanë njoftuar autoritetet shëndetësore të këtij shteti amerikan.
Janë raportuar të paktën 11 raste të infektimit me bakterin “Vibrio vulnificus” gjatë muajve të fundit në qarqet Bay, Broward, Hillsborough dhe St. Johns në Floridën qendrore – një rajon i njohur për turistë dhe komunitete bregdetare.
“Në ujërat e zonave të ndryshme jetojnë shumë baktere,” ka deklaruar Daniel Egan, specialist i sëmundjeve infektive nga spitali Orlando Health.
Autoritetet deri më tani nuk kanë dhënë informacione të mëtejshme mbi viktimat. Në shumë raste, vdekja ndodh brenda dy ditëve nga shfaqja e simptomave.
Infektimi me këtë bakter është i rrallë, dhe Qendrat për Kontrollin dhe Parandalimin e Sëmundjeve (CDC) pranojnë mesatarisht 150 deri në 200 raste në vit.
Megjithatë, pasojat mund të jenë jashtëzakonisht të rënda. Vibrio vulnificus mund të shkaktojë nekrotizimin e fascies, një infeksion i rëndë që çon në vdekjen e shpejtë të indeve përreth plagëve të hapura. Shumë pacientë përfundojnë në kujdes intensiv, dhe në disa raste kërkohet edhe amputim i gjymtyrëve.
Shkalla e vdekshmërisë është rreth 20 për qind, ndërsa nëse bakteri hyn në qarkullimin e gjakut, mund të arrijë deri në 50 për qind. Në shumë raste, vdekja ndodh brenda dy ditëve nga fillimi i simptomave.
Bakteri zhvillohet në ujëra të ngrohta dhe të kripura në zonat bregdetare, si edhe në ujëra të përziera të kripura dhe të ëmbla. /Telegrafi/