Një meta-studim i ri tregon se katër lloje ushtrimesh – yoga, tai chi, ecja dhe vrapi – janë ndër metodat më efektive për përmirësimin e gjumit dhe trajtimin e pagjumësisë. Këto ushtrime rezultuan po aq të dobishme sa terapia kognitive-biheviorale për pagjumësinë (CBT-i), që aktualisht konsiderohet standardi i artë në trajtim.
Studimi analizoi 22 prova të kontrolluara me përzgjedhje të rastësishme dhe zbuloi se yoga dha rezultatet më të forta, ndërsa përfitimet nga Tai Chi ishin më jetëgjata – deri në dy vjet, shkruan burimi Medical News Today transmeton Gazeta Shneta.
Yoga mund të rrisë kohëzgjatjen e gjumit me gati dy orë dhe të përmirësojë efikasitetin e tij me 15%, ndërkohë që ndihmon në rënien më të shpejtë në gjumë dhe në zgjimin më të rrallë gjatë natës.
Tai Chi përmirësoi ndjeshëm cilësinë e gjumit, duke shtuar pothuajse një orë gjumë të plotë dhe duke ulur kohën e zgjimit pas gjumit. Ecja dhe vrapi sollën një ulje të konsiderueshme të ashpërsisë së simptomave të pagjumësisë.
Pagjumësia prek rreth 16.2% të popullsisë globale, dhe në SHBA 14.5% e të rriturve kanë raportuar vështirësi për të rënë në gjumë ose për të qëndruar në gjumë gjatë një muaji të fundit.
Ndërsa CBT-i kërkon seanca individuale me terapistë, aktivitetet fizike janë më të aksesueshme dhe mund të integrohen më lehtë në stilin e jetesës.
Rezultatet e studimit, të publikuara në “BMJ Evidence-Based Medicine”, ofrojnë një qasje të thjeshtë dhe natyrale për ata që kërkojnë të përmirësojnë gjumin e tyre. /Gazeta Shneta/