Një studim i ri tregon se ekspozimi ndaj një grupi kimikatesh sintetike të njohura si PFAS – ose “kimikatet e përjetshme” – mund të rrisë rrezikun për zhvillimin e diabetit të tipit 2.
Shkencëtarët vlerësojnë se një në nëntë të rritur në mbarë botën jeton me diabet, dhe mbi 90% e këtyre rasteve janë të tipit 2, shkruan burimi Medical News Today transmeton Gazeta Shneta.
Përveç faktorëve të njohur si obeziteti, gjenetika, mënyra e jetesës sedentare, pirja e duhanit dhe dieta jo e shëndetshme, kërkimet e mëparshme kanë treguar se edhe ndotësit mjedisorë – përfshirë ndotjen e ajrit dhe disa kimikate – mund të ndikojnë në shfaqjen e sëmundjes.
“Diabeti i tipit 2 është një sëmundje komplekse dhe gjenetika nuk e shpjegon tërësisht,” tha Dr. Vishal Midya nga Shkolla e Mjekësisë në Mount Sinai. Ai është autori korrespondent i studimit të botuar së fundmi në revistën “eBioMedicine”, i cili heton efektet e PFAS te të rriturit e shëndetshëm në Nju Jork.
PFAS gjenden në shumë produkte të përdorimit të përditshëm, si detergjentë, paketimet ushqimore, enët jo ngjitëse, veshjet kundër ujit, shkumë për fikjen e zjarrit dhe produkte rezistente ndaj njollave. Këta përbërës quhen “kimikate të përjetshme” sepse nuk shpërbëhen natyrshëm, duke ndotur ujërat dhe tokën, e potencialisht edhe ushqimin.
Studiuesit analizuan të dhënat mjekësore të 53,790 pjesëmarrësve dhe krahasuan nivelet e PFAS në gjakun e 180 pacientëve të sapodiagnostikuar me diabet me një grup të ngjashëm pa sëmundje.
Sipas Midya, ky është një nga studimet e para që heton ndikimin e PFAS në të rritur të shëndetshëm para se sëmundja të diagnostikohet klinikisht. /Gazeta Shneta/