Në provincën Guangdong është raportuar një përhapje e madhe e virusit ‘chikungunya’, i cili transmetohet nga mushkonjat, me mbi 7,000 raste të konfirmuara.
Qyteti më i prekur është Foshan, ku pacientët trajtohen me masa strikte për të ndalur përhapjen e sëmundjes. Përveç Foshanit, të paktën 12 qytete të tjera në këtë rajon jugor kanë regjistruar infeksione, me rreth 3,000 raste të reja vetëm javën e fundit.
Ndërsa shumica e personave kanë simptoma të lehta, autoritetet kanë bërë thirrje për vigjilencë dhe masa mbrojtëse shtesë. Ky virus nuk është i njohur gjerësisht në këtë zonë dhe për këtë arsye shqetësimi është rritur ndjeshëm. Shtetet e Bashkuara kanë paralajmëruar udhëtarët që të tregojnë kujdes të shtuar gjatë qëndrimit në këtë pjesë të botës.
Virusi ‘chikungunya’ zakonisht shfaqet brenda 3 deri në 7 ditë pas pickimit nga një mushkonjë e infektuar, me simptoma si ethe, dhimbje në kyçe, skuqje, dhimbje koke dhe ënjtje të muskujve, transmeton albinfo.ch.
Megjithëse shumica e pacientëve shërohen brenda një jave, në raste më të rënda, dhimbjet e kyçeve mund të zgjasin për muaj ose vite. Personat më të rrezikuar janë të porsalindurit, të moshuarit dhe ata me sëmundje kronike si diabeti ose problemet e zemrës.
Nuk ekziston një kurë specifike për këtë virus, por vdekjet janë të rralla. Virusi u identifikua për herë të parë në vitin 1952 dhe prej atëherë është përhapur në më shumë se 110 vende në botë.
Organizata Botërore e Shëndetësisë rekomandon si masë parandaluese heqjen e vendeve me ujë të ndenjur, ku mushkonjat shumohen, për të ndaluar përhapjen e mëtejshme të virusit.