Kosova po përballet me një valë të madhe zjarresh që po përfshijnë të gjithë territorin, njofton Agjencia e Menaxhimit të Emergjencave.
Kreu i AME-së, Genc Metaj, gjatë një konference për media, deklaroi se 633 raste kanë përfshirë gjithë territorin vetëm javën e fundit, transmeton Gazeta Shneta.
“Vendi është duke u përballur me zjarre të shumta të cilat janë duke u shfaqur në gjithë territorin e vendit. Agjencia e Menaxhimit Emergjent në koordinim të plotë me njësitë e zjarrfikësve në terren, qendrat operative emergjente, Ministrinë e Punëve të Brendshme, Policinë e Kosovës si dhe me autoritetet lokale është e angazhuar maksimalisht dhe po bën përpjekje të vazhdueshme për ta menaxhuar situatën dhe për të parandaluar çdo pasojë nga situata e krijuar. Vetëm gjatë javës së fundit janë raportuar 633 raste të zjarreve. Gjatë kësaj jave situatë më e rënduar ka qenë në fshatrat Kçiq i vogël, Zasellë, Dumnicë, Merdare, Orllan, ku është rrezikuar tërësisht jeta e njerëzve…”, ka thënë ai.
AME apelon tek qytetarët që të jenë të kujdesshëm dhe të respektojnë masat e sigurisë për të parandaluar shpërthimin e zjarreve të reja./Gazeta Shneta/
