Sëmundjet seksualisht të transmetueshme (SST) nuk prekin vetëm të rinjtë. Megjithëse të rriturit në të 20-at dhe 30-at kryesojnë për raste si gonorrea, klamidia dhe sifilizi, shifrat po rriten ndjeshëm edhe tek moshat mbi 50 vjeç në disa vende evropiane.
Një raport i vitit 2024 nga Agjencia e Sigurisë Shëndetësore në Mbretërinë e Bashkuar tregoi një “rritje të qëndrueshme” të rasteve të SST-ve tek personat mbi 65 vjeç. Vetëm në 2023, u regjistruan 1,649 raste të gonorresë, klamidias dhe sifilizit në këtë grupmoshë, krahasuar me 576 raste në 2014, shkruan Euronews Health transmeton Gazeta Shneta.
Të dhëna të ngjashme u raportuan edhe në Francë e Danimarkë, ndërsa në nivel të Bashkimit Evropian, 32% e rasteve të sifilizit në vitin 2023 i përkisnin personave mbi 45 vjeç.
Ndryshe nga infeksionet bakteriale që kurohen me antibiotikë, si gonorrea apo sifilizi, sëmundje virale si HIV dhe herpesi mbeten të përjetshme.
Studime të reja parashikojnë që rastet e SST-ve tek të moshuarit do të vazhdojnë të rriten deri në vitin 2040, duke sjellë edhe kosto më të larta trajtimi.
Ekspertët thonë se faktorë si plakja e popullsisë, përdorimi i medikamenteve për funksionin seksual, lidhjet e reja pas vdekjes së partnerëve apo divorcit, si dhe mungesa e informacionit mbi parandalimin, ndihmojnë në këtë rritje.
Përtej trajtimit, theksohet domosdoshmëria e destigmatizimit.
Shpesh ekziston perceptimi i gabuar se të moshuarit nuk kanë apo nuk duan jetë seksuale. Kjo sjell mungesë komunikimi me mjekët dhe partnerët mbi përdorimin e mbrojtjes apo testimin për SST.
Specialistët nxisin që si publiku, ashtu edhe profesionistët e shëndetit, të trajtojnë nevojat seksuale të të moshuarve me kujdes, pasi shëndeti seksual është pjesë e mirëqenies në çdo moshë. /Gazeta Shneta/