Spitali i Përgjithshëm i Pejës ka hyrë në fazën përfundimtare të një projekti madhor: digjitalizimin e shërbimeve të Infermierisë. Ky zhvillim shënon një hap të rëndësishëm drejt modernizimit të kujdesit shëndetësor dhe rritjes së cilësisë së shërbimeve për pacientët.
Sipas një njoftimi zyrtar, thuhet se ky projekti është konceptuar dhe i detajuar nga Zyra e Teknologjisë Informative të spitalit. Si rezultat i këtij angazhimi, mbështetje financiare ka ofruar Organizata IHS (Integrated Health Services in Kosovo), një projekt i financuar nga Agjencia Zvicerane për Zhvillim dhe Bashkëpunim (SDC), transmeton Gazeta Shneta.
Vetëm faza e parë e implementimit, që po realizohet në Bllokun Internistik, ka një vlerë prej 150,000 eurosh – fonde të siguruara nga kontributi bujar i Qeverisë së Zvicrës përmes projektit IHS, që është partneritet mes qeverive të Zvicrës dhe Kosovës.
Ndërkohë, me funksionalizimin e tij, Spitali i Përgjithshëm i Pejës bëhet institucioni i vetëm publik në rajon që ofron shërbime të tilla moderne, ku përfituesi kryesor është vetë pacienti.
Çdo shtrat i pacientit do të digjitalizohet, duke përfshirë:
– Sistemin e thirrjes së infermierëve dhe personalizimin e shtratit, përfshirë ndriçimin.
– Pajisje smart (tableta) në dhomat e pacientëve me qasje në të dhënat shëndetësore dhe terapitë.
– Monitorim të kohës së reagimit të infermierëve pas thirrjes së pacientit.
– Butona sigurie për raste emergjente, si rëniet aksidentale.
– Dhoma monitorimi për infermierët me pasqyrë të shtretërve, parametrave jetësorë dhe kërkesave të pacientëve.
Ky sistem do të ketë ndikim të dyfishtë: nga njëra anë do të rrisë nivelin e kujdesit dhe sigurinë për pacientët, dhe nga ana tjetër do të ulë kostot operative të spitalit përmes reduktimit të përdorimit të letrës, pasi të gjitha të dhënat do të ruhen në mënyrë digjitale.
“Pas digjitalizimit të laboratorit dhe sistemeve radiologjike, ky projekt shënon një hap tjetër vendimtar drejt realizimit të vizionit të institucionit”, thuhet në komunikatë. /Gazeta Shneta/