Një analizë e re nga Danimarka ka zbuluar se më shumë se gjysma e personave që përdorin barna të njohura për humbje peshe, si Ozempic dhe Wegovy, i ndërpresin ato brenda 12 muajve.
Sipas studiuesve, 52% e pacientëve ndalojnë përdorimin e ilaçeve brenda vitit – 18% brenda tre muajve të parë, 31% deri në gjashtë muaj, dhe 42% deri në muajin e nëntë.
Ekspertët e quajnë këtë nivel ndërprerjeje “shqetësues”, pasi efektet pozitive të barnave humbasin sapo trajtimi ndërpritet, duke bërë që pesha e humbur të rikthehet.
Studimi zbuloi se më të prirë për të hequr dorë nga këto barna janë të rinjtë nën 30 vjeç, personat që jetojnë në zona me të ardhura të ulëta, meshkujt, si dhe pacientët me probleme shëndetësore kronike ose ata që përdorin ilaçe gastrointestinale dhe psikiatrike – çka sugjeron se efektet anësore, si nauzea apo të vjella, mund të kenë ndikuar.
Çmimi i lartë i barnave duket gjithashtu të jetë një faktor. Në Danimarkë, një muaj trajtim me Ozempic kushton deri në 313 euro, krahasuar me rreth 120 euro në Gjermani, ndërsa nuk mbulohet nga shteti përveçse në rastet me diabet tip 2.
Rezultatet e studimit, që do të prezantohen këtë javë në takimin vjetor të Shoqatës Evropiane për Studimin e Diabetit në Vjenë, nënvizojnë nevojën për mbështetje më të madhe ndaj pacientëve.
Sipas autorëve, këto barna nuk ndihmojnë vetëm në uljen e peshës, por lidhen edhe me reduktimin e rrezikut për sëmundje të zemrës, varësi dhe kancer./Gazeta Shneta/