Një studim i ri nga Michigan State University ka zbuluar se lojërat sportive në realitetin e shtuar dhe virtual (AR/VR) nuk janë vetëm argëtim, por edhe një ndihmë e vlefshme për shëndetin mendor dhe lidhjet sociale.
Hulumtimi, i botuar në International Journal of Human-Computer Interaction, tregoi se pjesëmarrësit që luanin lojëra si pingpong, bowling apo bilardo në AR/VR, raportuan ndjesi më të forta të mirëqenies psikologjike dhe më pak ndjenja vetmie, shkruan MedicalXpress transmeton Gazeta Shneta.
Sipas profesorëve Sanghoon Kim dhe Sangchul Park, “forca e këtyre lojërave qëndron tek aftësia për të krijuar ndjesinë e pranisë sociale, duke i bërë lojtarët të ndihen sikur janë bashkë me të tjerët, edhe pse në një botë virtuale”.
Studimi përfshiu 345 pjesëmarrës dhe tregoi se ata që ishin më të angazhuar në lojë kishin përfitime më të mëdha emocionale, veçanërisht individët që ndiheshin të vetmuar në jetën e përditshme.
Megjithatë, studiuesit theksojnë se AR/VR nuk është zgjidhje universale për problemet e vetmisë apo ankthit. Disa persona mund të ndihen të pasigurt në ndërveprimet virtuale, prandaj përdorimi i këtyre teknologjive duhet të shoqërohet me kujdes dhe udhëzime të qarta.
Ekspertët sugjerojnë se lojërat AR/VR sportive mund të bëhen pjesë e ndërhyrjeve terapeutike, por gjithashtu kërkohet edukim dhe rregullim për të shmangur efektet e mundshme negative./Gazeta Shneta/