Pagjumësia është një çrregullim gjumi i karakterizuar nga vështirësia për të fjetur ose për të qëndruar në gjumë.
Rreth 16% e popullsisë botërore vuan nga kjo gjendje, ndërsa një pjesë e konsiderueshme përjeton pagjumësi kronike, e cila shfaqet kur personi nuk fle siç duhet të paktën tre net në javë për më shumë se tre muaj, shkruan Medical News Today transmeton Gazeta Shneta.
Studimet e kaluara e kanë lidhur pagjumësinë me probleme të shumta shëndetësore, përfshirë diabetin e tipit 2, depresionin, obezitetin, tensionin e lartë të gjakut, sëmundjet e zemrës dhe sidomos çrregullimet neurologjike si rënia njohëse, demenca dhe Alzheimeri.
Një studim i ri, i publikuar në “Neurology”, tregon se personat me pagjumësi kronike janë në rrezik 40% më të lartë për të zhvilluar demencë ose dëmtim të lehtë njohës (MCI), krahasuar me ata që kanë pagjumësi jo-kronike.
Ky rrezik është ekuivalent me plakjen e trurit për rreth 3.5 vite më tepër.
Studimi përfshiu 2,750 të moshuar me një moshë mesatare 70 vjeç, të cilët u ndoqën për më shumë se 5 vite.
Ata iu nënshtruan testeve të kujtesës dhe skanimeve të trurit, ku u evidentuan ndryshime në lëndën e bardhë dhe grumbullime të proteinës beta-amiloide, tipike për Alzheimerin.
Sipas Dr. Diego Z. Carvalho nga Klinika Mayo, ndikimi i pagjumësisë mbi rrezikun e demencës ishte më i madh se ai i faktorëve të njohur si hipertensioni, diabeti ose vetë mosha. Ai thekson se kjo gjetje e vendos pagjumësinë në qendër të faktorëve të rrezikut që mund të ndryshohen, duke pasur rëndësi të madhe për shëndetin publik, sidomos tek të moshuarit. /Gazeta Shneta/