Një studim i ri i publikuar në Nature ka zbuluar se tymi nga zjarret pyjore është bërë një kërcënim i madh shëndetësor në Shtetet e Bashkuara, duke shkaktuar mbi 41 mijë vdekje çdo vit.
Studiuesit paralajmërojnë se deri në vitin 2050 ky numër mund të rritet me 26,500 deri në 30,000 vdekje shtesë, duke e kthyer tymin e zjarreve në kërcënimin më vdekjeprurës të nxitur nga ndryshimet klimatike, më të rrezikshëm se vala e të nxehtit apo humbjet bujqësore, shkruan HealthDay transmeton Gazeta Shneta.
Ekspertët theksojnë se grimcat mikroskopike në tym hyjnë thellë në mushkëri dhe në qarkullimin e gjakut, duke rritur rrezikun për astmë, kancer të mushkërive, sëmundje të zemrës, si dhe probleme në shtatzëni. Për më tepër, kur digjen ndërtesa dhe plastika, tymi bëhet edhe më toksik.
Sipas autorëve, efektet e tymit po fshijnë dekada të progresit të Ligjit për Ajër të Pastër në SHBA, sidomos në shtetet perëndimore dhe qytete si Nju Jorku.
Ata bëjnë thirrje për veprim urgjent kundër ndryshimeve klimatike, duke paralajmëruar se ndikimet e tymit në shëndet publik janë më serioze sesa është kuptuar deri më sot./Gazeta Shneta/