Një studim i ri i publikuar në revistën “Neuron”, ka zbuluar mekanizma neurologjikë që lidhen me dëmtimin e kujtesës si pasojë e dietave me yndyrë të lartë. Hulumtuesit treguan se çrregullimet metabolike që shkaktohen nga ky lloj ushqimi dëmtojnë funksionimin normal të hipokampusit, zonë e trurit thelbësore për formimin e kujtesës.
Nëse këto rezultate konfirmohen edhe nga studime të tjera, shkencëtarët shpresojnë se ato mund të ndihmojnë në zhvillimin e ndërhyrjeve për të ulur ndikimin negativ në aftësitë njohëse, shkruan burimi Medical News Today transmeton Gazeta Shneta.
Sindroma metabolike, e lidhur ngushtë me dietat e pasura me yndyrë, përfshin një kombinim gjendjesh si: yndyrë e tepërt në bark, trigliceride të larta, kolesterol HDL të ulët, nivele të larta sheqeri dhe tension të lartë gjaku.
Kjo sindromë rrit rrezikun për sëmundje të zemrës, diabet tip 2 dhe goditje në tru. Hulumtimet kanë treguar gjithashtu se lidhet me rënie njohëse, kujtesë më të dobët dhe rrezik më të lartë për sëmundje neurodegjenerative si Alzheimer.
Truri, megjithëse përbën vetëm 2% të peshës trupore, konsumon rreth 20% të energjisë së trupit, duke e bërë shumë të ndjeshëm ndaj mënyrës së ushqyerjes.
Evidenca në rritje tregon se dietat me yndyrë të lartë ndikojnë negativisht në funksionet njohëse, madje edhe pas një kohe të shkurtër. Hipokampusi duket veçanërisht i cenueshëm ndaj këtyre ndryshimeve.
Ky studim kontribuon në sqarimin e lidhjes mes ushqyerjes së pasur me yndyrna, sindromës metabolike dhe dëmtimeve të trurit, duke hapur rrugë për kërkime të reja mbi parandalimin e demencës. /Gazeta Shneta/