Dietat ketogjenike, të cilat bazohen në marrjen e shumicës së kalorive nga yndyrnat dhe shumë pak nga karbohidratet, janë bërë të njohura si mënyrë jetese për menaxhimin e obezitetit dhe diabetit. Ato njihen për efektin e tyre në humbjen e shpejtë të peshës dhe madje përdoren në trajtimin e krizave epileptike.
Megjithatë, siguria e përdorimit afatgjatë mbetet e paqartë. Një studim paraklinik i ri afatgjatë me minj, i publikuar në “Science Advances”, tregon se dieta keto shkakton rritje të lipideve në gjak, depozitimin e tepërt të yndyrës në mëlçi dhe vështirësi në rregullimin e nivelit të glukozës, si pasojë e prodhimit të pamjaftueshëm të insulinës, transmeton Gazeta Shneta.
Në minjtë obezë, dieta keto ishte efektive për uljen e peshës, por ndikoi negativisht në shëndetin metabolik. Studiuesit vunë re se këto efekte mbi rregullimin e glukozës u përmirësuan pas ndërprerjes së dietës, duke sugjeruar se pasojat nuk janë të pakthyeshme.
Autorja e studimit, Dr. Amandine Chaix nga Universiteti i Utah, theksoi se duhen më shumë kërkime tek njerëzit për të kuptuar më qartë përfitimet dhe rreziqet kardiometabolike të ndjekjes së gjatë të dietës keto.
Këto gjetje ngrenë shqetësime mbi përdorimin e dietës keto si trajtim afatgjatë për obezitetin dhe diabetin. Edhe pse mund të ndihmojë në humbjen e peshës, rreziqet e mundshme për shëndetin e zemrës dhe metabolizmin duhet të merren seriozisht në konsideratë. /Gazeta Shneta/