Në formën e një pilule, ilaçi i njohur për humbje peshe, Ozempic, mund të ndihmojë personat mbipeshë ose obezë të humbasin kilogramët e tepërt, sipas një prove klinike të botuar në “New England Journal of Medicine”.
Pjesëmarrësit që morën çdo ditë pilulën me semaglutid humbën rreth 14% të peshës trupore pas 64 javësh, krahasuar me vetëm 2% te ata që morën placebo.
Semaglutidi është përbërësi kryesor i ilaçeve GLP-1, Ozempic dhe Wegovy. Sipas autorëve, doza 25 mg tregoi humbje të konsiderueshme në peshë me një profil sigurie të ngjashëm me format e tjera të këtij grupi ilaçesh, shkruan burimi Health Day transmeton Gazeta Shneta.
Në provën klinike u përfshinë 205 persona që morën semaglutid dhe 102 me placebo. Rezultatet treguan se 63% e atyre me semaglutid humbën të paktën 10% të peshës trupore, kundrejt vetëm 14% te placebo.
Gjysma e pacientëve humbën mbi 15% të peshës, ndërsa 30% arritën një reduktim prej 20% ose më shumë, shifra shumë më të larta se grupi kontroll.
Efektet anësore ishin kryesisht gastrointestinale, si të përziera dhe dispepsi, të ngjashme me versionin injektues.
Megjithatë, injeksioni vepron më shpejt, duke e bërë shfaqjen dhe zbutjen e efekteve anësore më të shpejtë.
Prodhuesi Novo Nordisk raportoi se pacientët që ndiqnin me përpikëri trajtimin humbën mesatarisht 17% të peshës trupore, krahasuar me 3% për placebo.
Kompania ka njoftuar se nëse pilula miratohet nga FDA, ajo mund të bëhet një opsion i rëndësishëm për trajtimin e obezitetit, duke iu përshtatur pacientëve që preferojnë trajtimin oral. /Gazeta Shneta/