Sipas Qendrave për Kontrollin dhe Parandalimin e Sëmundjeve (CDC), konsumimi i alkoolit lidhet me një rritje të rrezikut për disa sëmundje serioze. Përdorimi i tepruar mund të çojë në tension të lartë të gjakut, sëmundje të zemrës, goditje në tru dhe kancer.
Një fushë që po tërheq gjithnjë e më shumë vëmendje është ndikimi i alkoolit në funksionimin dhe shëndetin e trurit, shkruan burimi Medical News Today transmeton Gazeta Shneta.
Një studim i publikuar në revistën “Neurology”, analizoi se si pirja e alkoolit ndikon në neuropatologjitë e lidhura me demencën.
Studiuesit shqyrtuan të dhëna mbi konsumimin e moderuar dhe të rëndë të alkoolit në të kaluarën dhe gjetën lidhje me arteriosklerozën hyaline – një trashje dhe ngushtim i enëve të gjakut që shfaqet zakonisht tek të moshuarit ose tek ata me probleme shëndetësore specifike.
Rezultatet treguan gjithashtu se personat me histori pirje të rëndë kishin raport më të ulët të masës së trurit dhe aftësi njohëse më të dobëta krahasuar me individët që nuk kishin konsumuar kurrë alkool.
Këto gjetje sugjerojnë se dëmet në tru nuk lidhen vetëm me pirjen aktuale, por edhe me historinë e konsumimit në të kaluarën.
Megjithëse nevojiten studime të mëtejshme për të kuptuar plotësisht mekanizmat biologjikë, provat e deritanishme nënvizojnë një ndikim të mundshëm dëmtues të alkoolit në tru dhe funksionet njohëse.
Prandaj, kufizimi i konsumimit të alkoolit mbetet një hap i rëndësishëm për mbrojtjen e shëndetit afatgjatë. /Gazeta Shneta/