Një ekip shkencëtarësh në Japoni ka arritur një përparim të madh duke identifikuar për herë të parë një shpjegim biologjik për “mjegullën mendore” që prek pacientët me COVID të zgjatur.
Studimi i udhëhequr nga profesori Takuya Takahashi në Universitetin e Qytetit Yokohama, tregon se pacientët me COVID të zgjatur kanë rritje të dukshme të aktivitetit të receptorëve AMPA – molekula thelbësore për kujtesën dhe të nxënit, shkruan Euronews Health transmeton Gazeta Shneta.
Mjegulla mendore përfshin probleme të kujtesës, vështirësi në përqendrim dhe ngadalësi në të menduar, duke qenë një nga simptomat më të shpeshta dhe më dobësuese të COVID-19 afatgjatë.
Studimet tregojnë se mbi 80% e personave me COVID të zgjatur përballen me këtë gjendje, e cila vështirëson punën, shkollën dhe jetën e përditshme.
Deri më tani, mungonin prova të qarta biologjike që shpjegonin këtë fenomen. Duke përdorur një teknikë të re të imazherisë molekulare, K-2 AMPAR PET, ekipi japonez krahasoi trurin e 30 pacientëve me COVID të zgjatur me 80 persona të shëndetshëm.
Rezultatet treguan se sa më i lartë aktiviteti i receptorëve, aq më të rënda simptomat njohëse.
Studiuesit vunë re edhe lidhjen mes inflamacionit dhe këtyre ndryshimeve, duke sugjeruar se përgjigjja imune e trurit mund të jetë nxitësi kryesor i çrregullimit.
“Këto të dhëna tregojnë qartë se mjegulla mendore e COVID të zgjatur duhet të trajtohet si një gjendje klinike e mirëfilltë. Kjo hap rrugë për diagnostikim dhe trajtime të reja,” thekson profesori Takahashi.
Megjithëse studimi është në fazat e hershme, ai ofron shpresë për zhvillimin e terapive që synojnë uljen e aktivitetit të tepërt të receptorëve, duke lehtësuar simptomat e miliona njerëzve të prekur në mbarë botën. /Gazeta Shneta/