Një studim i ri ka zbuluar se pirja e duhanit dyfishon rrezikun e goditjeve në tru të tipit “të pashpjeguara”, si tek mosha e mesme ashtu edhe tek të rinjtë.
Sipas studimit të publikuar në revistën “Neurology”, pirja e rëndë e duhanit është veçanërisht e dëmshme, pasi personat që pijnë më shumë se një pako në ditë për 20 vjet kanë më shumë se katërfish rrezik për goditje krahasuar me ata që nuk pijnë duhan, shkruan burimi Health Day transmeton Gazeta Shneta.
Studiuesit, të udhëhequr nga Phillip Ferdinand në Universitetin Keele të Mbretërisë së Bashkuar, u përqendruan në një formë të goditjes në tru të quajtur goditje kriptogjene — që ndodh kur rrjedha e gjakut në tru bllokohet pa një shkak të qartë.
Ata analizuan të dhënat e 546 personave të moshës 18–49 vjeç që kishin përjetuar një goditje të tillë dhe i krahasuan me një grup tjetër të së njëjtës moshë që nuk kishte pasur goditje.
Rezultatet treguan se 33% e duhanpirësve kishin pësuar një goditje të pashpjeguar, kundrejt 15% të atyre që nuk pinin duhan.
Rreziku ishte më i lartë tek meshkujt dhe te personat mbi 45 vjeç, ku shanset për goditje ishin gati pesë herë më të mëdha. Gjithashtu, sa më shumë duhan të pihej, aq më i madh bëhej rreziku.
Sipas Organizatës Botërore të Strokut, tymi i duhanit përmban mijëra kimikate që dëmtojnë sistemin e qarkullimit të gjakut.
Monoksidi i karbonit ul oksigjenin në gjak, ndërsa nikotina rrit presionin e tij. Për më tepër, duhani ndikon negativisht në kolesterol dhe shkakton ngurtësim të arterieve — duke rritur ndjeshëm gjasat për goditje në tru. /Gazeta Shneta/