Një në gjashtë infeksione bakteriale në botë nuk iu përgjigjet më trajtimeve standarde me antibiotikë, njofton një raport i ri i Organizatës Botërore të Shëndetësisë (OBSH). Ky fenomen, i njohur si rezistenca ndaj antimikrobikëve (AMR), ndodh kur bakteret dhe patogjenë të tjerë evoluojnë në mënyrë që antibiotikët standardë të mos mund t’i kontrollojnë më.
OBSH thekson se veprime të tilla si ndërprerja e trajtimit me antibiotikë përpara përfundimit të kursit ose përdorimi i tyre për sëmundje të padobishme përbëjnë një nxitës të këtij procesi.
Raporti i organizatës mbuloi mbi 23 milionë raste në 104 vende në vitin 2023 dhe tregoi se rezistenca ka arritur në rreth 40% të kombinimeve patogjen-antibiotik që u analizuan që nga viti 2018, shkruan burimi Euronews Health transmeton Gazeta Shneta.
Problemi është më i theksuar në vendet me të ardhura të ulëta dhe të mesme, ku survejimi dhe diagnostikimi mikrobiologjik është i kufizuar.
Në Azi Juglindore dhe Mesdheun Lindor, një në tre infeksione bakteriale tashmë është rezistente, krahasuar me një në pesë në Afrikë.
Rezistenca po rritet më shpejt tek bakteret gram-negative, përgjegjëse për infeksionet e rënda spitalore. Disa specie, si Klebsiella pneumoniae dhe E. coli, kanë shfaqur nivele rezistence mbi 70% në disa pjesë të Afrikës. Edhe trajtimi i fundit për gonorrienë, ceftriaksoni, po tregon shenja rezistence në disa vende të Mesdheut Lindor.
Tedros Adhanom Ghebreyesus, thekson se e ardhmja varet nga forca e sistemeve për parandalim, diagnostikim dhe trajtim infeksionesh, si dhe nga inovacioni me antibiotikët e gjeneratës së re dhe testet molekulare të shpejta. /Gazeta Shneta/