Përfaqësues nga Shërbimi Spitalor Klinik dhe Universitar i Kosovës pritën sot në vizitë zyrtare delegacionin e Shoqatës Italiane ASVI (Associazione Solidarietà Volontariato Insieme) me seli në Milano. Delegacioni u kryesua nga znj. Marinella del Passo dhe Dr. Gabriele Vignati, kardiolog pediatër.
Përfaqësuesit e ASVI-së u pritën nga dr. Ardian Shefkiu, U.D. Drejtor Shëndetësor në ShSKUK, si dhe ekipi i kardiokirurgëve, neonatologëve dhe anesteziologëve të QKUK-së: dr. Gazmend Spahiu, dr. Shpejtim Shurdhiqi, dr. Luan Morina, dr. Linda Kryeziu dhe Dardane Mehaj.
Qëllimi i takimit ishte diskutimi i mundësisë së nënshkrimit të një marrëveshjeje bashkëpunimi ndërmjet QKUK-së dhe Shoqatës ASVI, me synim themelimin e njësisë së kardiokirurgjisë pediatrike në Kosovë dhe trajnimin e stafit mjekësor kosovar në qendra të specializuara shëndetësore në Itali.
Shoqata ASVI ka kontribuar në Kosovë dhe rajonin e Ballkanit që nga viti 1999 në fusha të ndryshme, përfshirë ndihmën humanitare, zhvillimin komunitar, mbështetjen sociale dhe arsimore.
Sipas njoftimit, që nga viti 2009 deri më sot, me mbështetjen e kësaj shoqate janë operuar 180 fëmijë nga Kosova në Spitalin Ospedale Niguarda Ca’Granda në Milano./Gazeta Shneta/