Shkencëtarët e kanë ditur prej kohësh se sytë mund t’u japin mjekëve shenja të sëmundjeve që nuk lidhen direkt me syrit. Përmes enëve të gjakut në retinë, mjekët mund të identifikojnë shenja të presionit të lartë të gjakut, kolesterolit të lartë, diabetit dhe fazave të hershme të sëmundjeve të zemrës.
Një studim i ri, botuar në “Science Advances”, tregon se enët e gjakut të retinës mund të përdoren gjithashtu për të parashikuar rrezikun e sëmundjeve kardiovaskulare dhe për të vlerësuar shpejtësinë e plakjes biologjike të individit, shkruan burimi Medical News Today transmeton Gazeta Shneta.
Studiuesit analizuan skanime retinale, informacion gjenetik dhe mostra gjaku nga mbi 74,000 pjesëmarrës në katër studime kryesore si: “Canadian Longitudinal Study on Aging”, “GoDARTS”, “U.K. Biobank” dhe “PURE study”.
Dr. Marie Pigeyre, PhD, thekson se retina ofron një pamje unike, joinvazive të mikrovaskularitetit të trupit, i cili reflekton shëndetin vaskular në përgjithësi.
Me ndihmën e inteligjencës artificiale, skanimet retinale mund të zbulojnë ndryshime të vogla të lidhura me plakjen, inflamacionin dhe sëmundjet e zemrës, duke mundësuar parashikimin e hershëm dhe vlerësimin e rrezikut kardiovaskular.
Analiza tregoi se pjesëmarrësit me enë gjaku më të thjeshta dhe më pak të degëzuara kishin rrezik më të lartë për sëmundje kardiovaskulare dhe shenja të plakjes biologjike, përfshirë inflamacion të lartë dhe jetëgjatësi më të shkurtër.
Ky studim nënvizon potencialin e retinës si një biomarker joinvaziv për identifikimin e individëve me rrezik të lartë dhe mund të ndihmojë në zhvillimin e strategjive të personalizuara për parandalim dhe trajtim. /Gazeta Shneta/